Кайда күпме сөт савыла?

Район авыл хуҗалыгы берләшмәләренең җәмәгать терлекчелегендә, шулай ук крестьян-фермер хуҗалыкларында терлекләрне кышкы абзарларда асрауның йомгаклау этабы дәвам итә.

Ленин исемендәге хуҗалык бер сыердан уртача көнлек сөт савып алу буенча кышлату чорында озак вакыт алда бара. Район авыл хуҗалыгы һәм азык-төлек идарәсеннән алынган оператив мәгълүматларга караганда, биредә кичәге көнгә аларның күрсәткече 14,8 килограмм тәшкил итә, бу узган елның шул чоры белән чагыштырганда 5,3 килограммга артык. "Кама Тамагы" авыл хуҗалыгы предприятиесендә бер сыердан көненә төгәл 13 килограмм сөт савып алалар, бу узган елгыдан 1,8 килограммга артык. "Олы Кариле" ААҖ терлекчеләре күрсәткече 8,8 килограмм тәшкил итә.