Көз турында сынамышлар

Кояш батканда аяз булып, төньяктан салкынча җил булса, кырау төшәр.

Пәрәвезләр күп очса, көз җылы, кыш салкын килер.

Яфраклар коелырга ашыкмаса – алда зәмһәрир кыш көтә.

Көзге көн бәс тотса, аязлыкка галәмәт.

Көзнең ахырында вак кына түгәрәк-түгәрәк боз яуса, кыш суык булыр.

Имәндә чикләвек күп булса, кыш салкын килә.

Суганның кабыгы ике кат булган елны кыш җылы булыр, ә кабыгы күпкатлы булган елны кыш салкын булыр.

Чия яфраклары коелып бетми торып, кар күпме яуса да, эреп бетә.

Көз көне каен агачлары астан саргаеп, яфракларын астан коя башласалар – кыш җылы килә, ә өстән саргаеп, өстән яфрак коя башласалар – кыш салкын килә.

Кыр казлары иртә китсә, кыш иртә килә.

Кыр казлары көзен киткәндә түбәннән очып китсәләр, кар тиз булыр.

Көз көне кошлар түбән очса, кыш – салкын, югары очса, кыш җылы килә.

Сентябрь җылы һәм коры булган саен, кыш соңрак килә.