“Көтегез һәм яхшыга өметләнегез!”

Махсус хәрби операциядә катнашучы якташыбыз Айназ Сәлимов авыр яраланган. Бу хәл 12 ноябрь иртәсендә була, аның башына, аякларына һәм кулларына зыян килгән. Ул шул ук көнне кич белән әти-әнисенә үзен хастаханәгә илтүләре турында хәбәр иткән. Бу шалтыратудан соң уллары белән элемтә өзелә, әти-әнисе аны эзләп табу өчен күп көч куя. Алар бу эштә ярдәм күрсәткән дусларына һәм танышларына, бигрәк тә Әминә Мөхәммәтшинага, Хөснетдиновлар гаиләсенә — Рим Гафият улына һәм аның улы Илмир Рим улына бик рәхмәтле. Айназны Белгород госпиталендә исән килеш эзләп тапканчы, якыннарының ниләр кичергәннәрен җиткерүе кыен, бу вакытта табиблар егетне ашыгыч рәвештә Мәскәүгә озаталар. Сишәмбе көнне әти-әнисе һәм абыйсы Айназ белән күрешүгә ирешә. Әмма башта Айназ академик Н.Н. Бурденко исемендәге Милли Медицина нейрохирургия тикшеренү институтының реанимация бүлегендә була, анда аңа илнең иң яхшы нейрохирурглары операция ясый, аннары солдатны Химкига күчерәләр. Әнисе Гөлнара Сәлимова андагы медицина хезмәткәрләренең һәр пациентка бик игътибарлы булуы турында әйтте. Табиблар Айназның хәлен тотрыклыландыруга ирешкән, алда әле операцияләр һәм озак вакытка сузылачак тернәкләнү чоры көтә, ул үзе дә, әти-әнисе дә бар да яхшы булачагына ышана. Гөлнара Әүхәт кызы улы янында хастаханәдә калган. Бу көчле ханым улының кәефенең һәм сәламәтлегенең үз ышанычына һәм кайгыртуына бәйле булуын аңлый, шуңа күрә ул аның янәшәсендә калырга булган. 

Айназ хәзер үзен яхшырак хис итә. Социаль челтәрләрдәге аралашу чатларының берсендә районда яшәүчеләр аның белән сөйләшүгә иреште. Барлык каматамагылылар аның тиз арада терелүен тели. Мобилизацияләнгәннәрнең якыннары Айназдан андагы егетләрнең хәлләре белән кызыксыналар. Айназ аларны яхшыга өметләндерергә тырыша һәм үзе хәрби операция урынында булган вакытта каматамагылылар арасында югалтулар булмавы турында хәбәр итә.

Абыйсы – полиция участковые Азат Сәлимов турында газетабызның алдагы санында язган идек, ул: "Хәзер Айназның хәле тотрыклы, кул-аяклары урынында, алда дәвалану һәм тернәкләнү көтелә. Әлбәттә, без барыбыз да бик борчылдык. Аңа хәзер хастаханәдә әни ярдәм итә", - диде.

Ә без исә бер дигән ике ул үстергән күп балалы Сәлимовлар гаиләсе турында сөйләргә телибез: Азат Кама Тамагында полиция бүлегенең участок хезмәткәре булып хезмәт куя һәм хәзер райондагы ике катлаулы участокта эшли. Айназга 21 яшь, 2 ел элек Ногинскида армия хезмәте үткән. Өлешчә мобилизация вакытында да читтә калмаска дигән карарга килгән. Бронь алу мөмкинлеге булса да, Айназ, повестка алганнан соң, эшеннән китеп, ил өчен авыр вакытта хезмәт итәргә булган. Гөлнара һәм Әнәс Сәлимовларның төпчек балалары – кызлары Илгинә 7 нче сыйныфта укый, аңа 13 яшь, абыйлары белән бик горурлана.

Без Азат һәм Айназ тәмамлаган Кама Тамагы татар урта мәктәбенең тәрбия эшләре буенча директор урынбасары Гөлгенә Вәлиева белән сөйләштек. Гөлгенә Юныс кызы Сәлимовларның улларын тарих фәненнән укыткан һәм ул: «Алар бик тәртипле, акыллы балалар, тыныч холыклылар, икесе дә мәктәпнең иҗтимагый тормышында актив катнашты. Азат барысыннан да яхшырак укыды, ул хәзер дә мәктәпкә еш килә, без аны участок полиция хезмәткәре буларак укучылар белән очрашуларга чакырабыз. Айназ мәктәптә һәрвакыт ярдәмчебез булды, бик актив, игелекле һәм тырыш укучы иде. Хәзер бездә сеңелләре Илгинә белем ала, ул яхшы укый, олимпиадаларда катнаша. Мин бу гаилә турында бары уңай фикердә генә. Гаилә башлыгы Әнәс Сәлимов мәктәпнең Әтиләр советы составында тора, Гөлнара мәктәптәге җыелышларга һәрвакыт йөри, алар балаларын тәрбияләүгә зур игътибар бирәләр. Яхшы кешеләр турында яхшы сүзләр генә әйтәсе килә. Ә без барыбыз да Айназга ныклы сәламәтлек һәм тизрәк терелүен телибез!»- диде.

Сәлимовлар гаиләсе Даныш авылында яши, авылда яшәүчеләрнең күпчелегенә хас булганча, хуҗалыклары зур: терлекләре күп, яшелчә бакчалары бар. Үзләре дә эшләп үскән, балаларын да хезмәт белән тәрбияләгәннәр. Моннан тыш икесе дә эшли: Гөлнара Әүхәт кызы - район үзәгендә ипи пешерүче, Әнәс Габделхәлим улы Кама Тамагында машина йөртүче булып эшли.

«Балалар безгә һәрвакыт булыша. Ә хәзер, бу катлаулы чорда, туганнарыбыз, күршеләребез, авылдашларыбыз безгә көч биреп тора. Без өйдә булмаганда, йорт-җиребезне карап торучы өебезнең тоткасы – 85 яшьлек әниебезгә рәхмәтлемен. Барыгызга да зур рәхмәт!"- диде Гөлнара һәм каматамагылыларга: «Изге теләкләрегез, җылы сүзләрегез өчен зур рәхмәт, алар безгә бик кирәк. Без районда яшәүчеләрнең барысына да бик рәхмәтле, аларга ныклы сәламәтлек һәм иминлек, ә якыннарын көтүчеләрнең газиз кешеләре белән исән-сау очрашуларын телибез!»-дип теләкләрен җиткерде.

Айназ үзе хастаханә палатасыннан: «Якыннарыгызны көтегез, аларга мораль яктан ярдәм итәргә тырышыгыз һәм барысы да яхшы буласына ышаныгыз! Әниемне һәм солдатларыбызның әниләрен Әниләр көне белән тәбрик итәм, барысы да сезнең кайгыртуыгызга һәм ышанычыгызга бәйле!» - диде.