Технологияләр төрле, максат уртак

Бу көнне ике заманча чәчү комплексы Архангель Келәре янындагы кырга чыкты.

Бу авыл хуҗалыгы оешмасында no till технологиясе буенча эшлиләр, монда яз көне дымны томаламыйлар, тырмаламыйлар һәм культивация ясамыйлар, шунда ук чәчүгә керешәләр.

- Биредәге басу 2000 гектардан артык мәйданда, - диде җитештерү участогы җитәкчесе Динур Төхфәтуллин. - Иртән без техниканы калибрлыйбыз – чәчү һәм ашлама нормасын куябыз. Бер комплекс эшкә әзер, икенчесен калибрлыйбыз һәм шулай ук кырга чыгарабыз. Монда сабан бодае чәчәчәкбез.

Николай Петрухин Красновидоводан, авыл хуҗалыгында 30 елдан артык механизатор булып эшли. Үзенең хезмәт эшчәнлеген Горький исемендәге колхозда башлаган.

- 2020 елдан бирле «Август»та эшлим. Миңа мондагы мөнәсәбәт тә, хезмәт хакы да, җимерелми эшли торган заманча техника да ошый. Тынычлап эшлисең, эшеңнең бары тик сиңа гына бәйле булуын беләсең.

Игорь Романов Осинники авылында яши. Мәктәптән соң Тәмтедәге СПТУны тәмамлый, совхозда, карьерда эшли, Казанга китә, ләкин кире кайта һәм хәзер «Август»та эшли.

- Миңа предприятие ошый. Монда кешеләр тыныч, хезмәт хакын вакытында түлиләр. Ышанычлылык хисе бар, - ди ул.

Тагын ике чәчү комплексы Балтач янындагы кырга чыкты. Монда борчак чәчәргә җыеналар.

Шул ук көнне традицион технология буенча эшли торган «Олы Кариле» ҖЧҖда, басуларда дымны томаладылар. Алты механизатор тырмада эшли. Караталда – “МТС”та Альберт Габдуллин һәм Марат Садриев, “К-700”дә Рәхимҗан Яруллин. Олы Кариледә сменалап “МТЗ”да Илдар Галимҗанов белән Нияз Димиев һәм “Аксион”да Ринат Заһиров.

Илдар Галимҗанов – тәҗрибәле механизатор, авыл хуҗалыгында 1995 елдан бирле хезмәт куя. Язгы кыр эшләре башланганнан бирле инде бер атна тырмалауда эшли.

Ринат Заһиров Яңа Саладан, «Август»та эшләп алган, ләкин бу чорда үзенең зур ярдәмче хуҗалыгында эшләргә өлгермәгән.

- Монда андый киеренке ритм юк, гәрчә эссе вакытта эш күп булса да, - ди Ринат Заһиров. - Сезон башланганнан бирле күпьеллык үсемлекләрне тырмаладым, хәзер җирне сөрәм, аннан соң культивацияләүгә керешәчәкмен һәм шунда ук чәчүне башлаячакбыз.

«Олы Кариле» ҖЧҖ баш агрономы Мансур Шәйхетдинов мәгълүматлары буенча, чәчүгә киләсе атна башында, тырмалауны тәмамлагач, керешәчәкләр.