Төзелә торган объектлар зур контрольдә

Аларның беренчесе Даныш авылы клубы булды. Объект 1 июньдә файдалануга тапшырылачак. Бинаны капиталь ремонтлау гыйнварда ук башланган, ул вакытта «Премиум» ҖЧҖ төзелеш фирмасы түбә һәм эчке бүлгеләрне сүтүгә керешкән, шуннан соң бинадан диварлар гына калган.

- Бүгенге көндә бинада эчке эшләр төгәлләнеп килә, - диде прораб Анатолий Мулюкин. - Өч ай эчендә без атламалар урнаштырдык һәм түбәне яптык, фасадны тышладык һәм җылыттык, инженер челтәрләрен, тәрәзәләрне, ишекләрне алыштырдык, идәнгә плиткалар җәйдек, бүлгеләр төзедек.

- Хәзер нинди эшләр башкарасыз?

- Тәрәзә һәм ишек яңакларын монтажлауны төгәллибез, шуннан соң бирегә штукатурчылар киләчәк, алар стеналарны буяячак. Бер үк вакытта түшәмнәрне монтажлаячакбыз.

- Бинада инде җылы, монда нинди җылылык булачак?

- Электр казаннары урнаштырылды, җылыту системасы монтажланды, әмма без бинаны газ казаннарына тоташтыру мөмкинлеген калдырдык, - дип хәбәр итте газетага бу эшне башкарган эшче Илнур Фәезов.

Төзүчеләрнең янәшәдәге территорияне төзекләндерәсе һәм аны койма белән әйләндереп аласы бар. Данышлылар түземсезлек белән өй туе көтә, алар яңа клуб турында бик озак хыялланганнар иде.