Нәрсә ул «Бердәм пособие» һәм аны кем алачак

Киңәйтелгән киңәшмәдә Россия Федерациясе Пенсия фонды идарәсе җитәкчесе Илмир Гыйльметдинов җыелган кешеләрнең  игътибарын "универсаль” сүзенең юкка чыгуына юнәлтте, чөнки кертелгән төзәтмәләрнең максаты - балалы гаиләләргә хатын-кызның йөклелек чорыннан алып, балага 17 яшь тулганчыга  кадәр дәүләт ярдәме түләүләренең бердәм шартларын билгеләү.

- Яңа пособие элеккеләреннән нәрсә белән аерылачак?

- Бердәм пособие бүгенге көндә гамәлдә булган берничә түләүне берләштерәчәк. Ә атап әйткәндә: йөклелекнең иртә срокларында медицина оешмасында исәпкә баскан хатын-кызга айлык пособие; вакытлыча хезмәткә яраксызлык очрагында һәм ана булу сәбәпле мәҗбүри социаль иминиятләштерелергә тиеш булмаган гражданнарга бала карау буенча пособие; 3 яшькә кадәр беренче баланың тууы (уллыкка алуы) белән айлык түләү; 3 яшьтән 7 яшькә кадәр һәм 8 яшьтән 17 яшькә кадәр булган балага айлык түләүләр; 3 яшькә кадәр икенче һәм аннан соңгы баланың тууына (уллыкка алынуына) бәйле рәвештә айлык түләү.

2023 елның 1 гыйнварыннан пособие алу хокукына баланың ата-аналарының берсе, уллыкка алучысы яки опекуны ия булачак. Ул РФ гражданины булырга һәм ил территориясендә яшәргә тиеш. Гаиләдә 17 яшькә кадәрге берничә бала булса, Бердәм пособие һәркемгә билгеләнә. Әгәр бала 2023 елның 1 гыйнварына кадәр туса, гаиләнең сайлау хокукы булачак - элеккеге кагыйдәләр буенча пособие алырга яки яңа Бердәм пособиегә күчәргә. Инде пособие алучылар аларны билгеләнгән срок тәмамланганчы алуны дәвам итәчәк.

Бала көткән хатын-кызлар 12 атнага кадәр медицина оешмасында исәпкә куелганда алты яки аннан да күбрәк атна йөкле булу өчен пособиегә исәп тота алалар.

- Пособиене ничек алырга? Гаилә башкарырга  тиеш гамәлләрнең алгоритмы нинди?

- Ул җан башына уртача керем бер яшәү минимумыннан азрак булган гаиләләргә түләнәчәк. Татарстанда 2022 елда ул балалар өчен 11 476 сум, эшкә яраклы халык өчен 12 896 сум тәшкил итә.

Пособие гаилә ихтыяҗын бәяләү нәтиҗәләре буенча билгеләнә. Тикшерелә торган вакыт өчен керем бөтенләй булмаган очракта түләүдән баш тартырга мөмкиннәр. Гаиләнең күчемле һәм күчемсез милеге һәм барлык банк кертемнәре дә исәпкә алыначак.

- Нинди вакыт өчен исәп-хисап ясалачак?

- Гариза биргән бер айга кадәрге 12 ай. Мәсәлән, 2023 елның гыйнварында бала вәкиле Бердәм пособиегә гариза биргән, димәк, исәп-хисап өчен гаиләнең 2021 елның декабреннән 2022 елның ноябренә кадәр кереме исәпләнәчәк. Исәп-хисап чорында гаиләнең барлык керемнәре кушыла, аннары 12 айга һәм гаилә әгъзаларының санына бүленә. Сан һәр кеше өчен ай саен яшәү минимумыннан түбәнрәк  булырга тиеш. Исәпләгәндә, әгәр көндезге бүлектә укысалар һәм рәсми никахта тормасалар, гаилә составына 23 яшькә кадәрге балалар кертелә.

- Бердәм пособие акчалата күпме сумманы тәшкил итәчәк?

- Түләү суммасы төбәк яшәү минимумының  50, 75 яки 100% ка тигез булачак. Татарстанда балаларның яшәү минимумы нигезендә балаларга бердәм пособие күләме – 11 476 сум, ә йөкле хатыннар өчен — эшкә яраклы халык өчен яшәү минимумыннан 12 896 сум исәпләнәчәк.