Кечкенә идеядән зур проект барлыкка килде

Ике ел элек сәяхәтче Тимур Циунчук Иделнең уң як ярында сукмак маршруты булдыру идеясе белән табигать территорияләрен үстерү һәм экотуризм дирекциясенә мөрәҗәгать итте.

– Ә без ике рекреация кластерын - «Зәңгәр күлләр» һәм «Кама Тамагы»н тоташтыру турында уйлаган идек, Тимур да нәкъ менә аларны тоташтырырга тәкъдим итте. Шулай итеп «Идел сукмагы» дигән яңа проект барлыкка килде, - диде проектның барлыкка килү тарихы турында проект кураторы Лидия Зимина.

Бу мәсьәләне хәл итү өчен дирекция җитәкчесе Оксана Саргина җитәкчелегендә команда төзелде. «Идел сукмагы» – Иделнең уң як ярында 350 километр озынлыктагы төзекләндерелгән җәяүлеләр маршруты. Маршрутка сукмакның теләсә кайсы ноктасыннан чыгарга мөмкин, катлаулылык буенча теләсә кайсы маршрутны яңа туристлар яки тәҗрибәле туристлар өчен сайларга була.

Трассаның беренче чираты Югары Ослан, Кама Тамагы районнарын һәм Казанның Урицкий паркыннан алып барлык диннәр гыйбадәтханәсенә кадәрге маршрутны үз эченә ала. Икенче чират Яшел Үзән, Биектау һәм Тәтеш районнары буенча маршрутлардан торачак. Сукмак буенча тукталышлар, хезмәт күрсәтү зоналары төзеләчәк, анда туристлар ял итә, явым-төшемнән ышыклана, хезмәтләрдән файдалана, азык-төлек запасын тулыландыра алачак. Хезмәт күрсәтү зоналарында җирле эшмәкәрләр туристларга хезмәт күрсәтә.

Шулай ук юлда кисәтүче аншлаглар, мәгълүмат стендлары, хәрәкәт юнәлеше күрсәткечләре урнаштырылачак. Карта һәм төгәл юл күрсәтелгән мобиль кушымта булдырылган, ул сезгә адашырга ирек бирми һәм дөрес маршрут төзергә булыша. Ике ай эчендә бу кушымта 2,5 меңнән артык тапкыр йөкләтелгән.

Бу идеянең ничек барлыкка килүе турында Тимур Циунчук сөйләде.

- Мондый юллар бөтен дөнья буенча бар. Без җәяүлеләр маршрутларында эшнең ничек оештырылуын өйрәндек һәм ике ел дәвамында маршрутны төзедек. Юл башта карталарда тикшерелде, моның өчен берничә картографик чыганактан максималь тулы мәгълүмат кулланылды. Аннары маршрутны үз аякларыбыз белән сынап карадык. Сукмакны бер үк вакытта матур, кызыклы, уңайлы һәм куркынычсыз итү мөһим.

Беренче тапкыр мин сукмак буйлап 2021 елның июлендә Россия Федерациясенең атказанган сәяхәтчесе Александр Советов белән бергә үттем. Яхшылап әзерләндек: урыннарда иң яхшыларын сайлап алу өчен, алдан ук берничә трассировка төзедек. Сукмакның юллар аша үткән участокларын әйләнеп узу урыннарын таптык.

2022 елда без көньяктан төньяк-көнбатышка таба икенче зур экспедиция оештырдык. Юлны ничек мантыйклы һәм кызыклырак итәргә икәнен белергә теләдек. Монда безгә ярдәмчел һәм игелекле кешеләр булышты. Шуңа күрә безнең сукмакны беренче чиратта кешеләр өчен һәм кешеләр турындагы тарих дип әйтергә мөмкин.

Дирекция бу җәйдә теләгән һәркем өчен бушлай чаралар сериясен үткәрәчәк. Тимур Циунчук белән бөтен сукмакны үтәргә яки походларга өч-дүрт сәгатькә кушылырга мөмкин. Бу вакыйгаларны игътибардан читтә калдырмас өчен, volzhskaya_tropa_tatarstan сайтындагы яңалыкларны һәм VK һәм Telegram социаль челтәрләрендәге анонсларны күзәтеп барыгыз.

Презентациядә катнашучыларны район башлыгы Наил Вазыйхов сәламләде, ул проектның көчәя баруын билгеләп үтте.

- Районда яшәүчеләр елдан-ел проект белән күбрәк кызыксына. Безнең бурыч – районга мөмкин кадәр күбрәк туристларны җәлеп итү. Шуңа күрә туристларга ошый торган, ә халыкка өстәмә акча эшләү мөмкинлеге бирә торган нинди хезмәтләр күрсәтә алуыбыз турында уйланыйк, - диде ул һәм кызыклы презентация өчен дирекция хезмәткәрләренә рәхмәт белдерде.

Аннан соң проект җитәкчеләре һәм идея илһамландыручылары Казаннан һәм башка районнардан килгән волонтерлар белән бергә сукмакның Кама Тамагы районындагы өлеше буйлап уздылар һәм, туристлар безнең районның матурлыгын тулысынча бәяли алсын өчен, 20 капчык чүп җыйдылар.