«Бэркут» АТПсында уку елы алдыннан автобус паркы кабул ителде

Юл хәрәкәте иминлеге дәүләт инспекторы Илназ Галимов автобусларда дару тартмалары, янгын сүндергечләр, авария билгеләре һәм яктылык кайтара торган элементлы жилетлар булуны тикшерде.

- Һәр мәктәп автобусында шулай ук тахографлар урнаштырылырга, транспорт чаралары ГЛОНАС системасына тоташтырылырга тиеш, - дип билгеләп үтте Илназ Галимов. - Мәктәп автобуслары елына ике тапкыр техник тикшерү уза.

АТП паркын 16 мәктәп автобусы тәшкил итә, шуларның 15е рейс автобусы һәм берсе резервта тора. Предприятие штатында 21 кеше эшли.

- Иртән машина йөртүчеләр юлламалар язалар, медицина тикшерүе узалар. Аннары транспорт чараларына техник тикшерү үткәрәләр, - ди АТП директоры Радик Хәмидуллин.

- Уку елына автобуслар әзер, ә юллар?

- Ике авылга – Олы Салтыкка һәм Шәпкәгә керү юллары борчый, - ди Радик Хәмидуллин.

- Ике юл да 1 сентябрьгә куркынычсыз хәлгә китереләчәк, - дип хәбәр итте газетага «Главдортранс» ДКУның баш белгече Дмитрий Толпекин. - Машина йөртүчеләрне тигез булмаган юл турында кисәтү өчен өстәмә юл билгеләре куелачак. Юлларны норматив хәлгә китерү өчен капиталь ремонт кирәк. Олы Салтыкка юл җәй башында азмы-күпме нормаль хәлгә китерелде. Ләкин урып-җыю бара һәм йөк машиналарының көчле хәрәкәте бу эшне юкка чыгарды.