Кама Тамагы Тенеш поселогында “Улыбка” балалар бакчасы турында

Көтеп алынган төзекләндерүдән соң бакча бинасы матур төс алган. Ул 1975 елда төзелгән һәм инде күптән капиталь ремонтка мохтаҗ иде.

"Яңартылган бинада инде бер ел эшлибез. Монда җылы, уңайлы",- ди бакча мөдире Гөлчирә Кәримова. Балалар бакчасы эчтән генә түгел, тышкы яктан да нык үзгәргән. Бакча территориясенә кергәндә уен мәйданчыгында матур итеп эшләнгән җәнлек һәм кош сыннарын, җил тегермәнен күрергә була. "Аларны ата-аналар үз куллары белән эшләделәр. Бакча тирәсен төзекләндерергә һәм бизәргә кирәк дигән тәкъдимебезне алар хуплап кабул иттеләр. Төзекләндерү барышында балаларга җилдән һәм кояштан яшеренер өчен күләгә булдыручы япмалар ясалды", - ди сөенеп Гөлчирә Тәлгать кызы.

- Оныгы бу бакчага йөрүче профессиональ эретеп ябыштыручы Роберт Хәйруллин металл конструкция эретеп ябыштырды, аңа Альберт Шәфигуллин һәм Сергей Гурьянов булышты. Төрле эшләрдә эшләп, әтиләр һәм дәү әтиләр балалары, оныкларына уңайлы булсын өчен күп көч куйдылар. Барысын да санап бетереп булмый, 20дән артык кеше катнашты.

Бүген балалар бакчасына 36 бала йөри: 1дән 3 яшькә кадәр - 14, 4тән 7 яшькә кадәр - 22. Алар белән 3 тәрбияче шөгыльләнә. Укыту-тәрбия эше ФДУС программасы буенча алып барыла, ләкин дидактик материаллар һәм мультимедиа җиһазлары җитми.

"Бездә балалар бик сәләтле, район һәм республика бәйгеләрендә катнашалар, призлы урыннар яулыйлар. Ата-аналар белән актив хезмәттәшлек итәбез. Барлык бәйрәмнәрне бергә үткәрәбез", - ди Гөлчирә Тәлгать кызы.

Балалар бакчасының үз участогы бар, анда кишер, чөгендер һәм төрле тәмләткечләр үстерәләр. Бу яшелчәләр балаларның көндәлек менюсына яхшы өстәмә. Бакчаны "Кама Тамагы гипс руднигы" ААҖ да игътибарсыз калдырмый, финанс ярдәме күрсәтә.

Әлбәттә, эштә проблемаларсыз булмый. Гөлчирә Тәлгать кызы әйтүенчә, бакчада балалар белән сәламәтләндерү чаралары үткәрү өчен физкультура залы, шәфкать туташы кабинеты юк. Балаларга җирле фельдшер тарафыннан медицина тикшерүе үткәрү турында район үзәк дәваханәсе белән килешү төзелгән. Башкарасы эшләр күп әле. Яңа мөдир проблемаларны хәл итү юлларын эзли, төрле җитәкчеләргә мөрәҗәгать итә, бакчада уңайлы, куркынычсыз һәм мавыктыргыч булсын өчен тырыша.