Автоледи-2013

23 августта Казан шәһәрендә "Автоледи-2013" республика конкурсы үткәрелде. Безнең районнан анда 10 ел машина йөртү стажы булган биш бала анасы Марина Ежова катнашты.
-Агымдагы елда ярышларның теоретик өлеше юл хәрәкәтенең яңа кагыйдәләрен исәпкә алып үткәрелде,-ди БДД фонды бүлекчәсе директоры Сания Гайнетдинова. -Махсус мәйданчыкта практик өлешне Марина яхшы башкарды. 57 катнашучы арасыннан ул 20 нче урынны яулады. Аңа безнең үтенечне игътибарсыз калдырмаганы өчен рәхмәт белдерәбез, ул беркайчан да безне авыр хәлгә куймый, конкурсларда һәрчак теләп катнаша. Марина тәҗрибәле машина йөртүче, аның нәтиҗәләре дә шул хакта сөйли. Узган ел да ул шушы конкурста катнашып фотоаппарат алган иде, ә быел мультиваркага лаек булды.