Коточкыч фаҗига: Омскида солдатлар үлде

Омск тирәсендәге Светлый бистәсендә яңа гына армиягә алынган солдатлар казармасының түбәсе һәм стенасы ишелгән.

Бу хәл 12 июльдә «отбой»дан соң булган. Һәлак булучылар саны ике дистәгә якынлаша, зыян күрүчеләр саны да аз түгел, дип хәбәр итә рәсми чыганаклар. Дүрт катлы казармада барлыгы 337 хәрби хезмәткәр булган.

РФ Оборона министрлыгы мәгълүматларына караганда, казармада ремонт эшләре үткәрелгән булган. Инженерлык челтәрләре, идән, түбә, тәрәзә алыштырылган. Әмма перепланировка үткәрелмәгән. Хәзерге вакытта хәрабәләрне актару бара. Алар астында 38 кеше калган булган. Коткару эшләре дәвам итә. Бүген, 13 июльдә Омскида гадәттән тыш хәлләр нәтиҗәләрен бетерү буенча комиссиянең ашыгыч утырышы булачак.,