Җиләкле базар. Казанда урман сыйлары нинди бәядән сатыла?

Быел яңгырлар яву сәбәпле яшелчәләр һәм җиләк-җимешләр бер айга соңрак өлгерде. Былтыр аларны базар киштәләрендә 10 июньнән табып булса, быел исә 10 июльдән дә иртә күренмәделәр.

Укучыларыбызның "Быел базарларда җиләк-җимеш булмый мәллә?" дигән соравына җавапны Мәскәү һәм Колхоз базарларыннан эзләдек.

Барлык сораштырылган сатучылар да уңыш булмауга зарлана. Cәбәп итеп берәүләр җимешләрнең кояш җитмәү аркасында кызара алмавын, ә икенчеләр аларның дым аркасында чери башлавын куя.

Казан базарларына сатучылар нигездә якын тирәдәге районнардан килә: Яшел Үзән, Биектау, Апас, Питрәч, Арча һ.б. Әмма араларында күрше төбәкләрдән килгәннәре дә бар. Мәсәлән, Владимир Солдатов Мари Элдан килгән. Казанга ул каен җиләкләрен алып килгән.

"Бүген сатуга беренче көн чыгабыз. Былтыр быелгыга караганда сатуны 1 ай алдан башлаган идек. Бездә барлык кеше дә җиләк җыярга чыга, шуңа бездә конкуренция дә зур. Безгә Яшел Үзән аша килеп йөрисе авыр түгел, нибары 50 чакрым, әмма барыбер, яңгырлы ел булганга, зур табыш ала алмыйбыз. Бар җиләкләр дә чери", - диде Владимир.