Кама Тамагында чәчүне төгәлләделәр

Олы Кариле янындагы кырда 25 майда сабан бодаен чәчтеләр. Без механизатор Нияз Димиев һәм машина йөртүче Марат Вафин белән сөйләшеп алдык.

-Бу басу – быелгы сезонда ахыргысы, - диде Нияз Димиев. - Монда 88 гектар җир бар, бүген-иртәгә чәчүне тулысынча төгәлләрбез дип ышанам.

Нияз Димиев авыл хуҗалыгында 1989 елдан бирле эшли. Мәктәптән соң ул Тәмте һөнәр училищесын тәмамлаган һәм умартачы-машина йөртүче һөнәрен алган. Армиягә кадәр “22 нче партсъезд” колхозында комбайнчы булып эшләгән. Солдат хезмәтен баштан Ленинградта үткән, анда уку бүлегендә яшерен элемтә хезмәте сержанты исемен алган, аннары ел ярым Төрекмәнстан башкаласы Ашхабадта хезмәт иткән. Хәрби хезмәттән кайткач, колхоз умарталыгына умартачы булып урнашкан, анда 5 ел эшләгән.

- Аннары техникага күчеп, механизатор булып эшли башладым, - ди тракторчы. Шуннан бирле аның төп дусты – трактор.

"Кызыл Шәрык" холдингы оешкач, Нияз аның составында 10 ел Югары Ослан районында хезмәт куйган, ләкин кире туган авылына кайткан. Нияз Димиев әйтүенчә, туган йорттан да яхшырак бернәрсә юк. Моннан беркая да китәргә теләми, хатыны белән алар ике бала үстергәннәр, хәзер инде дүрт оныкларына да куанып яшиләр.

Чәчү эшләрендә аңа машина йөртүче Марат Вафин ярдәм итә. Марат тумышы белән Караталдан, мәктәптән соң Ленин исемендәге колхозда эшләгән. Армиягә кадәр ДОСААФ линиясе буенча машина йөртүче белгечлегенә укыган, һәм бу һөнәр аның гомерлек төп һөнәре. Армиядән кайткач, туган колхозында зур йөк машинасында эшләгән, аннары "Олы Кариле" ҖЧҖ составында хезмәт куйган, ә бу – кырык ел чамасы.

"Август-Кама Тамагы" ҖЧҖда чәчүне Осинники авылы янындагы кыр төгәлләде. Без монда Николай Хохловны очраттык. Бу участокта 25 май көнне 15 чәчү агрегаты эшләде.

Николай чирек гасыр диярлек авыл хуҗалыгында эшли. 1989 елда ул мәктәпне тәмамлап, Карл Маркс исемендәге колхозга урнашкан. Аннары армиядә хезмәт иткән, анда ул инженер-техник белгечлеге алган.

 - Казанда тракторчы булып эшләп алдым, ләкин барыбер Варваринога кайттым. 2020 елдан "Август-Кама Тамагы" ҖЧҖда механизатор булып эшлим.

Бу авыл хуҗалыгы предприятиесе оешканнан бирле ул аңа ышанган һәм ялгышмаган.

 - Яхшы техникада эшлим, - ди Николай. – “Россельмаш” та, “Аксион” да бик яхшы тракторлар, бик җайлы һәм уңайлы, аларда эшләү үзе бер рәхәт.

«Олы Кариле» ҖЧҖның баш агрономы Мансур Шәйхетдинов хәбәр иткәнчә, 25 майда әлеге авыл хуҗалыгы предприятиесе чәчүне төгәлләде.

«Бу сезонда фермерлар шулай ук актив эшли. Алексей Цыганов 4 майда чәчүгә кереште. Аның карамагында чәчкечләре булган өч трактор һәм сезонлы эшчеләр – дүрт ярдәмче бар. 15 майда алар 400 гектарда чәчүне төгәлләделәр. Орлыкка арпа, бодай, көнбагыш һәм люцерна чәчтеләр.