Чәчүне яңгыр гына туктата ала

Ике атнадан бирле куәтле заманча чәчү комплекслары «Август-Кама Тамагы» ҖЧҖ кырларын иңли.

Бер комплексның колачлау киңлеге 23 метр тәшкил итә, ике сменада эшләүче механизаторлар бер тәүлектә 200 гектарга кадәр чәчәргә өлгерә.

- Басуга 12 апрельдә чыктык, - ди Николай Удачин. – Чәчүне Кече Салтыктан башладык, Тәмте ягына таба барабыз. Комплекс зур, шуңа күрә төяү өчен күп вакыт кирәк. Сәгать ярым ашлык һәм ашлама төйибез, ике сәгать эшлибез.

Николай Радик Гафаров белән бергә эшли. Алар, чиратлашып, 1700 гектар мәйданда чәчкән. Хәзер сабан бодаен рапс буенча ноу тилл ысулы белән Антоновка янындагы кырда чәчәләр.

Комплекска ашлык төяүдә механизатор Петр Кулык, эшче Рафаэль Саттаров, ашламалар һәм орлыклар ташучы “КамАЗ” шоферы Марат Нигъмәтуллин ярдәм итә.