Геройлар үрнәгендә тәрбияләргә кирәк

14 октябрьдә «ТР махсус хәрби операция ветераннары ассоциациясе» Кама Тамагы бүлекчәсенең гомуми җыелышы булды. Аны башкарма комитет җитәкчесе Альберт Сәлимов үткәрде. Җыелышта ТР Дәүләт Советы депутаты Эдуард Шәрәфиев һәм ТР Премьер-министры ярдәмчесе генерал-лейтенант Владимир Майстренко катнашты.

Владимир Майстренко билгеләп үткәнчә, ил һәм республика хөкүмәте халык арасында патриотик кәеф күтәрү буенча зур эш алып бара.

- Аерым алганда, бу свода катнашучыларга һәм аларның гаиләләренә ярдәмгә кагыла. Шул максаттан Россиядә актив гамәлгә ашырыла торган программалар булдырылды. Һәм безнең бурыч барлык мөмкинлекләрне әлеге программаларның адресатларына җиткерү һәм аларга дәүләт ярдәменнән файдаланырга булышу.

Эдуард Шәрәфиев билгеләп үткәнчә, бүген бу эш белән берьюлы берничә иҗтимагый оешма шөгыльләнә.

- Без үзара көндәшлек итәргә тиеш түгел, бәлки бергәләп эшләргә тиеш. Нәтиҗәдә санга караганда, сыйфат артачак. Һәр районда ассоциация идарәсе булдырылган, ул асылда ветераннар советы, «Ватанны саклаучылар» фонды белгечләре, яшьләр оешмалары эшен координацияләргә тиеш.

Ноябрьдә республика конференциясе узачак, анда ассоциация Уставына үзгәрешләр кертеләчәк. Эш форматын һәр район мөстәкыйль билгеләячәк. Барысына да җирле бүлекләр идарәсен сайларга кирәк, анда җәмгыятьтә ихтирам казанган сугышчан хәрәкәтләр ветераннары керергә тиеш.

Безнең районда бүлекчәне Илья Андряшов җитәкли.  Шулай ук Илья Андряшов – Татарстан Республикасы Иҗтимагый советы әгъзасы, анда махсус хәрби операция ветераннары белән эшләү өчен җаваплы.

- Хәзер республикада юристлар һәм психологлар белән берлектә укучыларны патриотик тәрбияләү программасы төзелә. Ул әзер булуга, мәгариф идарәсе һәм «Ватанны саклаучылар» фонды белән бергә без аны район мәктәпләрендә гамәлгә ашыра башлаячакбыз. Үсеп килүче буынны патриотик тәрбияләү – җәмгыятебезнең өстенлекле бурычы, дип саныйм.

Җыелышта учреждение һәм иҗтимагый берләшмәләр җитәкчеләре, махсус хәрби операция ветераннары һәм мәктәп директорлары катнашты.