МОРДВА КАРАТАЕ: буфетчы Нюраның патшабикәгә әверелүе турында

Мордва Каратае авылы мәдәният йортының «Маски» театр коллективы «Идел-Йорт» конкурсына Эвелина Пиженко пьесасы буенча «Анна Ивановна һөнәрен үзгәртә» спектаклен тәкъдим итте.

Районда популярлык казанган автор

«Маски» театр коллективының Эвелина Пиженко белән хезмәттәшлек итүе беренче ел гына түгел. Бу авторның пьесалары, шул исәптән «Анна Ивановна һөнәрен үзгәртә» комедиясе районыбыз мәдәният йортлары сәхнәләрендә күп тапкырлар куела һәм тамашачылар арасында уңыш казана. Узган ел бу пьесаны Красновидово иҗат коллективы куйган иде, алар популяр «Иван Васильевич һөнәрен үзгәртә» фильмы сценариеның мондый интерпретациясен ошаткан театр сөючеләрнең уңай бәяләмәләренә лаек булды.
Һәм менә быел Мордва Каратае авылы мәдәният йорты сәхнәсендә бик тиз арада патшабикә Анна Иоанновнага әверелгән буфетчы Нюра вакыйгасы күрсәтелде.

Җырчы да, артист та

Буфетчы кызны да, патшабикәне дә бик ышандырырлык итеп Нина Соловьева уйнады, аның сәхнәдә чыгыш ясау тәҗрибәсе зур. Заманында Кирельский авылыннан күченеп, инде 20 елдан артык Мордва Каратаенда яши. Аның хезмәт эшчәнлеге авыл хуҗалыгында узган һәм ул еш кына сәхнәдә гади, тамашачыларга аңлаешлы хезмәтчән хатын-кызларны уйный, хәер, бу юлы патшабикәгә әверелүне дә бик яхшы башкарды.  

Ун елдан артык авылның мәдәниятен үстерә

Авыл мәдәният йорты мөдире Ирина Окунева, үзешчән театрның алыштыргысыз җитәкчесе буларак, сценарийны сайлап кына калмыйча, төп рольләрнең берсен – ягулык станциясендә эшләүче, кыска вакытка фрейлина Евдокия образында булган Дусяны да үзе башкарды.  
Ирина Федоровна 12 ел элек авыл клубы мөдире булу турындагы тәкъдимне кабул иткән. Авиация техникумын тәмамлагач, Казан самолетлар төзү заводында икътисадчы булып эшләгән булса да, авылда театр коллективы оештырырга карар кыла. Заманында туган ягына кайтып, берникадәр вакыт авыл хуҗалыгы өлкәсендә хезмәт куйганнан соң, ул авылның мәдәниятен үстерү белән шөгыльләнә башлый, моны ул яхшы башкара һәм авылдашлары арасында да теләктәшлек таба.

Төзүчедән артистлыкка

Ә Нина Пушкановага спектакльләрдә, кагыйдә буларак, ир-ат рольләре эләгә, мондый рольләрне башкарганда, аңа тавышын да, йөрешен дә,   йөз хәрәкәтләрен дә үзгәртергә туры килә. Бу юлы исә ул патшалыктагы приказчик кыз Марфа ролен башкарды, пьеса эчтәлеге буенча ир-атлар бөтенләй юк. 
Нина Мордва Каратаенда туып үскән, туган авылына кайтып урнашканчы, күп еллар төзүче-прораб булып эшләгән һәм хәзер иҗат белән шөгыльләнергә дә вакыт таба.

Иҗат шатлык китерә

Узган ел моркаратайлы- ларның «Себер–шимбә–мунча» спектаклендә тамашачылар өчен чын ачыш Галина Рыбакова булды. Бу аның спектакльдә беренче тапкыр катнашуы иде, ләкин еллар дәвамында оешкан коллективта ул үз урынын тапкан. Бу юлы Галина чегән хатыны ролен башкарды, анда аңа пьесаның башка геройлары белән аралашудан тыш, тамашачы алдында сәхнәдә генә түгел, залда да, дәртле итеп биергә туры килде.

Бухгалтер Анфиса Захаровна һәм бер үк вакытта Анфиска-Ключница ролен Антонина Исхакова башкарды, Наталья Богданова да, Шпачиха һәм диңгез аръягы илчесен уйнап, сәхнәгә шулай ук ике тапкыр чыкты. Иҗат коллективының актив катнашучысы Любовь Пушканова, шулай ук тавыш операторы эше белән шөгыльләнгән Татьяна Атяпина да артистларга сәхнә артында ярдәм итте.

Шул рәвешле, тамашачылар Мордва Каратае авылының үзешчән артистлары әзерләгән спектакльне карап ләззәт алдылар, ә моркаратайлылар якташлары өчен ел да яңа тамаша тәкъдим итә һәм һәр тапкырында да рәхмәтле тамашачының алкышларына лаек булалар…