Кыртапа: театр марафоны бөтен районны колачлады

Мәдәният йортындагы музей почмагы тамашачыны узган гасырдагы татар авылының милли көнкүрешенә алып кайта: бишек, керосин лампалары, борынгы үтүкләр һәм башка йорт кирәк-яраклары безгә авыл һәм аның халкының тарихы турында искә төшерә.

Мәхәббәт һәм аерылышу турында кыйсса

Ә сәхнәдә, уңайлы авыл йорты декорацияләрендә, олы яшьтәге пар Гөләндәм һәм Хафизулла язмышы турындагы драматик тарих башланды, картлык көннәрендә аларны үз балалары аера һәм бу фаҗигале финалга китерә. Әлеге пьеса элек районыбызның үзешчән коллективлары тарафыннан күп тапкырлар куелды, хәтта бу сезонда да «Ике болыт» спектаклен балчыклылар тәкъдим иткән иде инде, шуңа күрә жюри әгъзаларының бу спектакльне бәяләгәндә аны башка сәхнә версиясе белән чагыштыру өчен искиткеч мөмкинлек булды.

Драманың төп геройларын Әлфия Вәлиева һәм Марат Гыйльметдинов уйнады. Әлфия Көрәле авылыннан, Атабайда яши. Заманында Яшел Үзән медицина училищесын тәмамлаган һәм менә инде күп еллар Иске Казиле җирлегендә яшәүчеләрнең сәламәтлеге сагында хезмәт куя – фельдшер булып эшли. Ике улы һәм инде өч оныгы бар, алар дәвалый да, сәхнәдә дә уйный торган шундый энергияле әниләре һәм әбиләре белән горурлана ала. Ә менә Марат Гыйльметдинов безнең районнан читтә – Борнаш авылыннан. Ул чын авыл хезмәтчәне – механизатор да, терлекче дә. Эш белән мәшгуль кеше булса да, ерак араларны узып, репетицияләргә килеп йөргән. Марат бу спектакльдә үзенең өч туган апасы, авыл мәдәният йорты мөдире – тумышы белән Борнаш авылыннан булган Розалия Сафина чакыруы буенча катнашкан.

Бухгалтерлыктан мәдәнияткә 

Өстәвенә, Розалия театр коллективы җитәкчесе дә һәм үзе дә спектакльдә картлык көннәрендә әти-әнисен аерган, әмма әнисе вафат булганнан соң гына күп нәрсәне югалтканын аңлаган кыз ролен башкарды. Героинясыннан аермалы буларак, Розалия Сафинаның искиткеч гаиләсе бар: ике баласы һәм дүрт оныгы күңелсезләнергә ирек бирми һәм тормышын ямьләп тора.

- Биредә авыл халкы белән мәдәният йорты мөдире арасында бик актив бәйләнеш һәм үзара аңлашу бар, - ди жюри рәисе, мәдәният бүлеге җитәкчесе Ирина Кузиева. - Әйтик, биредә ел да уздырыла торган Авыл көне зур масштабта уза, төрле җиләк-җимешләрдән ясалган кайнатмалардан күргәзмә-бәйге оештырыла, өстәвенә, аларның рецептлары бер-берсеннән аерыла – һәм бу бары шушы авылда гына,  авылның башка бәйрәмнәре дә кызыклы уза…

Розалия Сафина авыл мәдәният йортында 4 ел эшли, аңа кадәр 30 ел Иске Барышта бухгалтер булып эшләгән. Колхозда кыскартулар башлангач, ул югалып калмаган, Алабуга мәдәният көллиятендә укулар узган, һәм, күргәнебезчә, авылда мәдәният белән актив шөгыльләнә, авылдашларына бик теләп спектакльләр куя.

Балалар һәм оныклар иҗатка комачауламыйлар

Спектакльдә битараф булмаган күрше хатынын Алсу Миңнуллина уйнады. Тормышта ул колхозда да, кибеттә дә, идарәдә дә, складларда да эшләгән. Кырык еллык механизаторлык стажы булган ире Рөстәм белән алар инде 40 елдан артык бергә, ике ул тәрбияләп үстергәннәр, аларга югары белем биргәннәр, ә балалары әти-әниләренә биш онык бүләк иткән. Шуңа күрә Алсуның, аның кайгыртучан һәм тырыш героинясының кебек үк, барысы да яхшы.

Гөлнара Җиһаншина спектакльләрдә беренче ел гына катнашмый, ул төп геройларның килене ролен башкарды. Ул инде 10 ел мәдәният йортын чисталыкта тота, аның ике баласы бар, һәм шул ук вакытта ел саен яңа спектакльдә катнашырга да өлгерә…

«Күренми торган фронт» һәм ышанычлы тыл

Әлбәттә, «күренми торган фронт» хезмәткәрләренең эшен дә билгеләп үтәргә кирәк. Спектакльнең тавыш операторы Гөлназ Габидуллина иде, ул күптән түгел Иске Барыш иҗат коллективы куйган спектакльдә уйнавы белән истә калды. Бу юлы ул, мәшгуль булуына карамастан, кыртапалыларга ярдәм итте: Гөлназ авыл җирлеге секретаре, шуңа күрә мәшәкатьләре җитәрлек, зур тату гаиләсе, өч баласы бар. Сүз уңаеннан, аның кече кызы – Иске Казиле урта мәктәбенең өченче сыйныф укучысы Язгөл сәхнә артында ышандырырлык һәм җанлы итеп Гөләндәм аралашкан мәче баласын сурәтләде. Шулай итеп, бу спектакльдә дә иҗади гаилә булды.

Ә суфлер булып үзешчән артистларга булышкан, спектакль ахырында аларны тамашачыларга тәкъдим иткән Нурия Абдулхаева мәктәптә 40 елга якын башлангыч сыйныфлар укытучысы булып эшләгән һәм, Марат Гыйльметдиновның хатыны – күрше районнан спектакль премьерасына килгән Миләүшә Гыйльметдинова кебек үк, һәр катнашучы өчен җан атып торды. Ул артистларга да, тамашачыларга да театр сәнгатенә риясыз хезмәт итүләре, үз эшләрен калдырып, якташларының иҗатына шатланыр өчен бергә җыелганнары өчен рәхмәт белдерде…