Җылы май көнендә Куйбышев Затонында «Яз авазы» балалар музыка мәктәбенең отчет концерты булды.

Остазлары ярдәме белән яшь музыкантлар сәнгать дигән сихри киңлекләргә юл ала, хисләрне һәм уй-фикерләрне музыка аша җиткерергә өйрәнә. Һәм уку елы азагында тырышлыкларының нәтиҗәсен әти-әниләре, инструменталь һәм вокал сәнгатен яратучылар бәяли ала.

Хисләр, музыка һәм илһам

Бу юлы да залда, музыка белән тиздән очрашуны уйлап, күтәренке атмосфера хөкем сөрде. Бу кичтә сәхнә төрле жанрларны, инструментларны һәм талантлы башкаручыларны берләштерде, аларның һәр чыгышы эчкерсез хисләр белән тулы иде.

Заринә Закирова һәм Роман Бобров (педагоглары Светлана Булатова һәм Ольга Закирова) дуэты «Все сбывается на свете, если очень захотеть...» җыры белән яшь талантлар парадын ачып җибәрде, ә Наталья Глинникова һәм Александр Мартынов җитәкчелегендәге «Раздолье» инструменталь ансамбле халык җырларыннан попурри башкарды.

Зәринә һәм Роман – Ольга Закирова шәкертләре, яшь булуларына карамастан, алар – республика һәм Бөтенроссия конкурслары лауреатлары һәм дипломантлары, ә «Раздолье» иҗат коллективы «Без бергә» Республика халык иҗаты фестиваленең муниципаль этабы призеры булды.

Фортепиано: классикадан җырларга кадәр

Музыка мәктәбе концертларында фортепианода уйнау гадәттәгечә аерым урын алып тора. Бу кичә дә искәрмә булмады: һәр башкаручы музыкага үз күңеленең бер өлешен салды. Пианистлар –  Мария Фурутина һәм укытучысы Зимфира Хәйбуллинаның (Салих Сәйдәшевнең «Совет Армиясе Маршы»), Арина Козинаның (Петр Чайковскийның «Мазурка»сы), «Как пошли наши подружки» рус халык җырын укытучысы Ольга Закирова белән ансамбльдә Амелия Рыбакованың, шулай ук Александра Виноградованың (композитор Екатерина Олерскаяның «Ванюшкины небылицы») уйнавын тамашачылар бик кызыксынып күзәтте.

Сүз уңаеннан, Мария Фурутина һәм Арина Козина – Тәтештә узган Бөтенроссия балалар иҗаты конкурсының 1 нче дәрәҗә лауреатлары, бу, һичшиксез, талантлы пианистларның алдагы уңышлары өчен менә дигән этәргеч.

Музыка мәктәбендә совет композиторлары музыкасын онытмыйлар, - ул чордагы популяр җырларының рухи һәм күтәренке көйләре халкыбызның мәдәни мирасының мөһим өлеше булып кала.

Композитор Раймонд Паулсның «Делу время» җырыннан көйне пианистка Анастасия Власова үзенең укытучысы Ольга Закирова белән ансамбльдә башкарды, укытучысы белән Элина Берлякова да чыгыш ясады, ул Владимир Шаинскийның «Зәңгәр вагон» җырыннан көйне уйнады.

Иҗатка мәхәббәт һәм балалар берләштерә

Яшь музыкантларны тәрбияләүче мәктәпнең эшчәнлеге Столяров исемендәге мәдәният йорты белән тыгыз бәйләнгән. Бу иҗат коллективларын үзара хезмәттәшлек, сәхнәгә һәм сәнгатькә мәхәббәт кенә түгел, иң мөһиме, балалар да берләштерә.

Мәдәният йорты мөдире Елена Аносова җитәкчелегендә концерт программасында өч бию коллективы катнашты, биючеләрнең күбесе музыка мәктәбендә шөгыльләнә.

«Мозаика» бию коллективы «Заинька» рус халык биюен җиңел һәм җанлы итеп тәкъдим итте, «Әкият» биючеләре татар халык биюен оста итеп башкардылар. Россия халыклары бердәмлеге елында бу – бердәмлекнең ачык мисалы. Елена Валерьевнаның тагын бер коллективы - «Весна» хәрби бию әзерләгән, өстәвенә, биюдә кызлар белән бергә Затон мәктәп-интернаты кадеты да катнашты, ул ритмик биюләр генә түгел, ә гадәти булмаган һәм дәртле трюклар да башкарды, шул рәвешле тамашачыларның көчле алкышларына һәм залда утыручы иптәшләренең хуплавына лаек булды.

Сүз уңаеннан, «Әкият» хореография коллективы - Халыкара конкурс-фестивальләрнең 1 дәрәҗә лауреаты, бу, һичшиксез, уңышның башы гына.

Гитара һәм баян: итальянча дәрт һәм рус күңеле

Гитарачы Роман Фазкуллинның укытучысы Наталья Глинникова белән чыгышы классик гитара яратучыларны куандырды. Наталья Глинникова – тәҗрибәле педагог, «Радуга талантов» Халыкара конкурсы лауреаты. Гитарачылар дуэты итальян халык җыры «Санта Лючия»не башкарды, тамашачыларга инде классикага әйләнгән бу әсәрнең кәефен җиткерде. Ә Роман Фазкуллин бу номер белән узган ел «Гитара магиясе» халыкара конкурсының 3 нче дәрәҗә лауреаты булды.

Баянчы, «StarБуа» Республика конкурсы лауреаты һәм мәктәп укытучысы Александр Мартынов атаклы «Смуглянка»ны башкарып, 9 Майга тамашачыларга искиткеч бүләк ясады, бу җырны илебездә генә түгел, ә аннан читтә дә яраталар.

Укытучылар, укучылар һәм чыгарылышлар бер сәхнәдә

Ә бу профессиональ һәм, һичшиксез, гүзәл дуэт тамашачыларның мәхәббәтен яулады һәм республика, Бөтенроссия дәрәҗәсеннән алып халыкара дәрәҗәгә кадәр күп кенә конкурсларда лаеклы бәяләнде.   Мәктәп педагоглары Зимфира Хәйбуллина һәм Ольга Закирова, тамашачыларның көчле алкышларына лаек булып, татар көйләренә попурри башкардылар

Һәм һәр мәктәпнең төп кыйммәте-бу, әлбәттә, аның уңышлы чыгарылышлары. Нәкъ менә алар үрнәгендә мәктәпнең елъязмасы языла һәм күп еллар дәвамында аның абруе саклана. Елгачылар бистәсендәге музыка мәктәбенең дә горурланырлык кешеләре бар.

Пианист Гүзәл Хәмзина - күптән түгел генә музыка мәктәбен тәмамлаган, иҗади яшьләрнең «иртәгә йолдызлар» республика программасы лауреаты-композитор Александр Ключаревның «Кылычлы бию»ен  башкарды. Ә тагын бер талантлы чыгарылыш, вокалист, күп санлы конкурслар лауреаты Маргарита Шишкина Роберт Рождественский сүзләренә Микаэл Таривердиевның "Ерак Ватан турындагы җыр»ы белән чыгыш ясады.

Концерт искиткеч вокаль нотада, дөресрәге – ноталарның күп төрлелегендә тәмамланды. Республика һәм бөтенроссия конкурслары лауреаты, чын сәхнә остасы Светлана Булатова тамашачыларны «Цвети, Земля моя» җырын чын күңелдән башкару белән рухландырды, ә «Вокал-Микс» төркеме (җитәкчеләре Светлана Булатова, Зимфира Хәйбулина һәм Ольга Закирова) җырлардан попурри башкарды, бу кичне залга җыелган һәркемгә музыка һәм чын сәнгать барлыкка китергән наз, мәхәббәт һәм яхшылыкка өмет хисләрнең бөтен төсләрен җиткерде.