КЫРТАПА: үткәннән хатлар

Мәдәният йортына кергәндә үк, Җиңү көненә багышланган матур плакатлар һәм бәйрәмчә бизәлгән тәрәзәләр игътибарны җәлеп итә, алар быелгы юбилей датасын гына түгел, 80 ел элек фашизмны җиңгән халкыбызның тиңдәшсез батырлыгын да искә төшереп тора.

Иҗат коллективының Мөнирә Сафина пьесасы буенча сәхнәгә куйган спектакле дә нәкъ менә шул хакта: сугыш елларының авырлыгы хатын-кызлар, картлар һәм балалар җилкәсенә төшкән, әмма иң  әрнеткәне – кешеләрнең якыннарыннан аерылуы. 

Сугыш һәм солых – сәхнәдә тормыш үзе

Авыл халкы һәм кунакларның сәләтле якташлары иҗатын тамаша кылырга бик теләп килүләре баштан ук аңлашылды – йөздән артык урынга исәпләнгән зал тулы иде, тамашачылар Иске Казиле, Иске Барыш һәм хәтта күрше Апас районыннан да килгән. Авылдашларын җирлек башлыгы Илшат Җиһаншин сәламләде, сүз уңаеннан, ул үзе дә һәрвакыт авылдашлары катнашындагы спектакльләргә йөри.

Ә спектакль гадәти булмаганча башланып китте: сәхнә белән тамаша залы арасында җәйге колхоз кыры тасвирланды, анда хатын-кызлар эш арасында флягадан су эчә, төшке аш әзерли. 1941 елның июнь аендагы тыныч тормышы сурәтләнде – яшел чирәм, хатын-кызлар ачык төсләрдәге киемнәрдән... Тиздән дүрт елга сузылачак куркыныч сугыш башланыр дигән уй башларына да килми әле аларның бу вакыт.

Ахырдан, озак еллар көткәннән соң, сугыш кырында югалган солдат хатлары табылгач, төп героиня үткәннән килгән әлеге хатларны укый, ул инде яраткан иренең һәлак булганын аңлый, тик шулай да аның өчен ул элеккечә исән. Бу кичтә әлеге дулкынландыргыч вакыйганы тасвирлаган артистлар тамашачыларның йөрәгенә юл тапкан кебек, күпме еллар үткәч тә, хатлар яраткан кешенең йөрәгенә юл тапса, чын мәхәббәт юкка чыкмас, югалмас…