Халкыбызның күңел җәүһәрләре
Милләтебезнең үткән тарихын, гореф-гадәтләрен барлап, аларны саклау һәм буыннан-буынга түкми-чәчми тапшыру максатыннан, район үзәгенең татар урта мәктәбендә күп еллардан бирле матур бер традициягә әверелгән кичә булды.
Сәхнәдә халкыбызның күңел җәүһәрләреннән булган “Әбием сандыгы хәзинәләре” күргәзмәсе оештырылган иде: кулдан чигелгән җәймәләр, сөлгеләр, кашагалар, крестьян аяк киеме – чабата эленгән, алып баручылар татар милли киемнәреннән. Чарага районыбызның хөрмәтле остабикәсе Мөнирә абыстай, мәчетнең хатын-кызлар берлеге әгъзалары чакырылган иде. Укучы кыз һәм ир балалар халкыбызның борынгыдан килгән гореф-гадәтләрен чагылдырган шигырьләрне укыды, җырлы уеннар, күмәк биюләр башкардылар. Мөнирә абыстай үзенең төрле еллардагы истәлекләрен туплап язган үгет-нәсихәтле шигырьләрен укыды, татар халык иҗатыннан мөнәҗәтләр әйтте. Чарадагы һәр күренеш татар халкының үткәндәге тормыш-көнкүрешен чагылдырып, бүгенгесе һәм киләчәге турында уйландырды. Педагог Гөлгенә Вәлиева һәм аның ярдәмчеләре чараны нәкъ менә шул максатны күздә тотып оештырган. Халкыбызның мәдәнияте, теле бай, гореф-гадәтләре күркәм, шуларны онытмыйк.
Рәфика Хәйруллина,
ТРның атказанган мәдәният хезмәткәре
Следите за самым важным и интересным в Telegram-каналеТатмедиа
Нет комментариев