Хәерле юл: 45 чыгарылыш сыйныф укучысы мәктәп белән саубуллашты

Быел 194 бала мәктәпне тәмамлый. Шуларның 45 е – унберенче сыйныф укучылары. Калганнары тугызынчы сыйныф белән саубуллаша.

Укучыларны район хакимияте вәкилләре, хөрмәтле кунаклар, педагоглар һәм ата-аналар котлады.

Кама Тамагы урта мәктәбендә узган бәйрәм чарасына район башлыгы Наил Вазыйхов килгән иде. Ул чыгарылыш укучыларын мәктәпне тәмамлаулары белән котлады, укытучыларга зур профессиональлеккә ия булулары, ә ата-аналарга лаеклы буын тәрбияләгәннәре өчен рәхмәт белдерде. ТР Дәүләт Советы депутаты Леонид Якунин һәм мәгариф идарәсе җитәкчесе Елена Гыймадиева да котлау сүзләре белән чыгыш ясадылар.

Рудник мәктәбен тәмамлаучыларны район башлыгы урынбасары Илнур Гыйниятов, мәгариф идарәсе җитәкчесе урынбасары Лилия Миңнуллина, «Август – Кама Тамагы» ҖЧҖ генераль директоры Александр Карасев һәм Тенеш җирлеге башлыгы Илшат Яруллин котладылар. Алар мәктәпне тәмамлаучыларга дуслыкларын саклап калуларын, укытучыларын рәхмәт белән искә алуларын һәм яңа казанышларга кыю рәвештә омтылуларын теләделәр.

11 сыйныф җитәкчесе Венера Хөсәенова 2026 нчы елгы чыгарылышның талантлы булуын, һәр укучының укуда, иҗатта һәм спортта үзен күрсәтүен билгеләп үтте.

Кама Тамагы татар мәктәбендә 9-11 сыйныфларны тәмамлаучыларны мәшгульлек үзәге җитәкчесе Наталья Кадыйрова һәм беренче сыйныф укучылары котлады.

Бәйрәм программасы вакытында чыгарылыш сыйныф укучылары иҗади номерлар тәкъдим иттеләр, мәктәп вальсын башкардылар һәм укытучыларга белем биргәннәре, ярдәмнәре һәм игътибарлары өчен рәхмәт белдерделәр.

Тантаналы чаралар районның башка мәгариф учреждениеләрендә дә узды. Барлык мәктәпләрдә дә чыгарылыш сыйныф укучыларына имтиханнарын уңышлы тапшыруларын, булачак һөнәрләрен төгәл сайлауларын һәм билгеләнгән максатларына омтылуларын теләделәр.