Казан педагогларның һөнәри аралашу үзәгенә әверелде

Кама Тамагы районы делегациясе (аның составына татар теле һәм әдәбияты укытучылары, мәгариф идарәсе вәкилләре керде) форум эшендә катнашты.

Каматамагылылар чараның соңгы көнендә генә булсалар да, аннан зур тәэсирләр белән кайтканнар. Кама Тамагы татар урта мәктәбе директоры Гөлназ Галиханова хис-кичерешләре белән уртаклашты:

"Форумны оештыру югары дәрәҗәдә иде. Бигрәк тә китаплар, уку әсбаплары һәм костюмнар күргәзмәсе игътибарны җәлеп итте – барысы да милли колорит белән сугарылган. Моннан тыш, Бөтендөнья татар конгрессының алдагы чараларында танышкан дусларыбызны күрү дә бик күңелле булды".

Районыбызның туган тел (татар теле) һәм әдәбияты укытучылары ассоциациясе җитәкчесе буларак, Эльвира Лизунина да мондый мөһим вакыйганы читләтеп үтә алмаган:

«Пленар утырышның атмосферасы тантаналы һәм илһамландыргыч булды. Без ТР мәгариф һәм фән министры Илсур Һадиуллинның, Татарстанның һәм Россиянең башка төбәкләреннән килгән әйдәүче педагогларының докладларын тыңладык. Чыгышларда инновация проектларына, шул исәптән ясалма интеллектны куллануга зур игътибар бирелде. Заманча алымнарны куллану балаларда татар телен өйрәнүгә кызыксыну тәрбияләүдә төп роль уйный».

Сәхнәдән Габдулла Тукайның «татар бәхете өчен мин җан атармын: Татар бит мин, үзем дә чын татармын» дигән сүзләре яңгырады, алар укытучыларыбызның күңелләренә хуш килде.

«Туган тел» форумы тәҗрибә уртаклашу мәйданчыгы гына түгел, укытучыларның һөнәри бергәлеген ныгытуга мөһим адым да булды. Мондый чаралар киләчәк буыннар өчен татар теленең байлыгын саклап калырга ярдәм итә.