Якташыбыз Татарстан Дәүләт премиясе белән бүләкләнде

Аларның берсе – Кама Тамагы мәктәбен тәмамлаган, техник фәннәр кандидаты, «В.Б. Шнепп исемендәге турбокомпрессор фәнни-тикшеренү институты» АҖның эксперименталь һәм цифрлы тикшеренүләр лабораториясе бюросы җитәкчесе Нариман Хәсәнов.

«Ел инженеры – 2022» Бөтенроссия бәйгесендә җиңү яулаган әлеге талантлы яшь галим турында безнең газета ике ел элек язган иде. Транспорт һәм табигый газны сыекландыру өчен нәтиҗәле һәм җитештерүчән турбомашиналар төзү буенча зур тырышлык куюы нәтиҗәсендә ул яңа казанышка ирешкән.

Россия Фәннәр академиясе академигы Вячеслав Алемасов исемендәге Дәүләт премиясе 2014 елда Рөстәм Миңнеханов Указы белән гамәлгә куелды. Ул яшь галимнәргә инженерлык фәннәре өлкәсендәге фәнни казанышлары, фән һәм сәнәгатьнең өстенлекле тармакларын үстерүгә керткән зур өлешләре өчен бирелә.  

Быел Нариман Хәсәнов әлеге абруйлы премиянең лауреаты булды, ул мәктәпне тәмамлауга ук фән дөньясына юл ачкан: КДЭУда белем алып, аны кызыл дипломга тәмамлаган, аннары аспирантурада укып, диссертация яклаган һәм 26 яшендә Нариман Гаяз улы техник фәннәр кандидаты булуга ирешкән. 

Якташыбыз – компрессорлар һәм турбиналарның исәпләү гидродинамикасы һәм термодинамикасы буенча белгеч. Мультипликаторлы компрессорларны исәпләү алгоритмнарын төзү буенча эш алып бара, радиаль турбиналарны проектлауның математик моделен төзи һәм гамәлгә кертә, яңа, югары нәтиҗәле һәм югары чыгымлы компрессорлар өчен модель баскычлары проектлый һәм конструкторлар алдына куелган катлаулы мәсьәләләрне хәл итү мөмкинлеге бирә торган башка бик күп нәрсәләрне проектлый, РФ Хөкүмәте стипендиаты һәм институтның яшь галимнәр һәм тикшеренүчеләр Советы секретаре.

Шул ук вакытта ул яшь галим генә түгел, яшь әти дә – күптән түгел генә Нариман һәм Вера Хәсәновлар гаиләсендә беренче бала туган. Без Дәүләт премиясе лауреатын чираттагы уңышы белән котлыйбыз һәм талантлы якташыбыздан яңа ачышлар көтәбез…