Финал этабына узган уникенең берсе - безнең районнан

Ильяс Габидуллин 20 елдан артык мәктәпнең профсоюз оешмасын җитәкли, 25 елдан артык участок сайлау комиссиясе рәисе булып тора. Ул өч бала атасы: олы балалары, белем алып, Казанда яши, кече кызы 3 нче сыйныфта укый. Мәктәптә физика кабинеты иң чиста һәм уңайлы кабинетларның берсе булып санала, биредә барлык җыелышлар һәм педагогик киңәшмәләр уза.

«Авыл укытучысы» бәйгесен Татарстан Республикасы Дәүләт Советы патронажында «Мәгариф» һәм «Гаилә һәм мәктәп» журналларының берләшкән редакциясе үткәрә. Быел ул унынчы тапкыр уздырылды.

– Мин «Мәгариф» журналы белән 10 елдан артык хезмәттәшлек итәм, - ди Ильяс Исмәгыйль улы. – Элек аларга география һәм физика буенча кроссвордлар җибәрә идем. Соңрак аларга «Шәһри Казан» газетасы кушылды, ул минем остазым турындагы эссемны бастырды. Ышаныч белән шуны әйтә алам: һөнәр сайлауга укытучым, җитәкчем – Иске Барыш урта мәктәбе директоры Фәрит Мәхмүт улы Рәхмәтуллин йогынты ясады. Ул безнең күбебездә педагогикага мәхәббәт тәрбияләде.

– Сез педагогикада ничә ел эшлисез?

– 1989 елда мәктәпне тәмамлагач, мин КДПИның физика-математика факультетына укырга кердем. Физика һәм информатика укытучысы белгечлеге алып, туган мәктәбемә кайттым. Быел утызынчы уку елым башланды. Аның яртысын мин Иске Казиле мәктәбендә эшлим. Мәктәп автобусында без ике укытучы һәм биш укучы Иске Барыштан килеп йөрибез.

– Бәйгедә ничек катнашырга булдыгыз?

– Бәйге үткәреләчәге турындагы мәгълүматны журналдан укып белдем һәм гариза тапшырдым. Беренче турга барлыгы 160 гариза тапшырылган, икенче турга 30 катнашучы, финал этабына 12 кеше узды. Киләсе атнада йомгаклау этабы булачак. Мин җиденче сыйныфта физика буенча «Матдә тыгызлыгы» темасына дәрес уздырачакмын, ул татар телендә үтәчәк.

– Хезмәттәшләрегез белән ярышырга яратасызмы?

– Әйе, мин конкурсларда бик теләп катнашам. «Ел укытучысы» район конкурсында өч тапкыр катнаштым. Моннан тыш, «Физика укытучысы», «Иң яхшы физика кабинеты» бәйгеләре булды, ике тапкыр «Укытучы-оста» гранты җиңүчесе булдым. Географ буларак «Тыюлык сукмаклары» бәйгесендә катнаштым.

– Сезнең мәктәптә яңартылган физика кабинеты бар. «Үсеш ноктасы» Сезгә эштә ничек ярдәм итә?

– Без лаборатор эшләр өчен приборлар комплектлары алдык, моннан тыш, сыйныфта интерактив такта бар, без аны бик актив кулланабыз. Ел саен диярлек безне республика программасы буенча яңа ноутбуклар белән тәэмин итәләр, шуңа күрә эшләргә теләге булганнарга моның өчен барысы да бар.

– Укучыларыгыз БДИны ничек тапшыра?

– Физика буенча укучыларым уртача 57-60 балл җыя. Бәлки, теләгән кадәр күп түгелдер, әмма “икеле”ләр юк, барысы да программаны үти. Физикадан тыш, мин география укытам һәм бу фәннән дә имтиханны барысы да тапшыра. Шулай ук минем укучыларым, география, геология, физика буенча фән олимпиадаларында катнашып, яхшы нәтиҗәләргә ирешәләр.