Миннән нәрсә аласың

Хокук саклау органнары хезмәткәрләре сүзләренә караганда, күпләр үз милекләрен саклау кагыйдәләре турында кайгыртмыйча шундый фикер йөртә.

Бәла килеп чыкканнан соң гына кешеләр урланган милекне кире кайтару өчен шактый көч һәм вакыт кирәк булуын аңлый.

-Безнең районда җинаятьләрнең 92 процент милеккә карата кылына,-ди полиция бүлеге җитәкчесе урынбасары Эдуард Идиятуллин. Болар нигездә урлау, талау, машина урлау. Бу категориягә кергән җинаятьләрнең күбесе урлау тәшкил итә. 70 процент очракта җинаятьчеләр өйгә тәрәзәдән керә, җинаятьләрнең 80 проценты төнлә кылына. Җинаять кылучыларның 81 процентының даими керем чыганагы юк. Җинаятьләрнең 41 процентын элек хөкем ителгәннәр кыла. Соңгы вакытта төзелеш мәйданчыклары җинаять кылу өчен иң кулай объектларга әверелде. Аннан кирпеч, профнастил, төзелеш җиһазлары, такта урлыйлар. Җинаятьчегә аларның шәхси төзелеш яки предприятие һәм оешмага каравы мөһим түгел. Җинаятьләрнең күп өлеше урлашуга карата бернинди чаралар күрелмәгән урыннарда кылына. Кама Тамагында суүткәргеч төзелеше алып барыла. Проект буенча аның өчен яңа тупланма сыешлык куелган. Кагыйдә буенча ул койма белән әйләндереп алынырга тиеш. Төзүчеләр койма монтажлауны төгәлләргә өлгермичә, профнастилны төзелеш мәйданчыгында калдырып киткән. Ә иртән аңардан "җилләр искән". Антоновкада шәхси йорт хуҗасы шундый ук профнастилдан койма ясап куйган. Аны саморез белән беркеткән, ә иртән койманың яртысы юкка чыккан. Үләксә базыннан да өч тапкыр профнастил салдырганнар. Бу очракта хәйләгә барырга кирәк. Коймадагы һәр табакка балта белән билге куйсаң, бу очракта ул җинаятьчеләрнең игътибарын үзенә җәлеп итмәс һәм койма да шул килеш калыр. Урлаган очракта да билге буенча аны табарга мөмкин булачак. Еш кына гамьсезлек тә җинаять сәбәпләренә китерә. Куйбышев Затон штпда яңа чистарту корылмалары төзегәндә проект буенча тондыру бассейны алыштырыла. Сыешлык зур габаритлы һәм аны алыштыру өчен корылманың бер стенасын сүтәләр. Өч стена белән стена берничә көн тора. Җинаятьчеләр форсаттан файдаланып бинадагы барлык җылыту радиаторларын кисеп китәләр. Агымдагы елда поселокта алты канализация люгы да урлана. Участок уполномоченные Рәмис Нәҗмиевның өлгерлеге нәтиҗәсендә җинаять кыска срокларда ачыла. Мондый люкның бәясе 2 мең сум. Карак люкның бер өлешен саткан, ә бер өлешен үз хуҗалыгында файдаланырга калдырган. Бу урланган әйберләр хуҗасына кайтарылды. Әгәр люклар цементланган булса, бу җинаять кылынмаган булыр иде. Тикшерү органнары барлык милекчеләргә бу җинаятьләрне кылуга ярдәм иткән сәбәбләрне бетерү турында күрсәтмәләр җибәрде. Үз милкеңә җитди караган очракта гына аларны кабат урнаштыру өчен акча тотарга кирәкми.