Казанның «La Primavera» камералы оркестры җитәкчесе һәм баш дирижеры, Россия Федерациясенең һәм Татарстан Республикасының атказанган сәнгать эшлеклесе Рөстәм Аббязов инде икенче ел талантлы яшьләр арасында бәйге үткәрә.
-Узган елны без конкурска гариза тапшырырга өлгермәдек, ә быел номерны да әзерләдек, вакытында гариза да җибәрдек, - диде район балалар музыка мәктәбе директоры Зөлфия Мөхәммәдиева.- Нәтиҗәдә мәктәбебез укучысы Алтай Шуктомов онлайн сайлап алу аша узды. Безнең өчен неаполитан җыры – Эдуардо ди Капуаның 1898 елда иҗат ителгән «O sole mio» (“Кояшым минем”) аккомпонементының демоверсиясе әзерләнгән иде. Музыка мәктәбендә без репитиция ясадык. Чәршәмбе көнне Алтай иртән җырны оркестр белән башкарып карады, ә кич, 20 гыйнварда, Зур концерт залы сәхнәсендә чыгыш ясады. Музыка мәктәбе укучысы өчен бу бик зур вакыйга һәм ул танылган музыкантның яшь талантларга карата игътибарлы мөнәсәбәте нәтиҗәсендә мөмкин булды.
Нет комментариев