Хәерле юл!

Укучылар, укытучылар, ата-аналар һәм яңа уку елына катнашы булучыларны тәбрик итәргә 3 мәктәпкә Татарстан Республикасы юстиция министры Мидхәт Корманов белән бергә муниципаль район башлыгы Зөфәр Гарәфиев барды.
Иң беренче булып Олы Салтык урта гомумбелем бирү мәктәбендә булдылар. Биредә кунаклар уку һәм ярдәмчел биналарны, балалар бакчасын, мәктәп музеен карады. Аннан соң актлар залында чараның рәсми өлеше үткәрелде.
Зөфәр Галимуллович билгеләп үткәнчә, бу мәктәп язучы-драматург, ТР Дәүләт Советы депутаты Туфан Миңнуллин тәкъдиме белән төзелде һәм биредә барысы да аның истәлекләрен саклый, шуңа күрә бу мәктәптә начар укырга ярамый. Бу мәктәптә яхшы белем генә түгел, гаилә ярдәмендә яхшы тәрбия дә алу мөһим. Язылган законнарны сакларга кирәк, әмма актив тормыш позициясе белән шөгыльләнергә мөмкинлек бирүче, таләп ителгән һәм җәмгыятькә кирәкле булу кебек үзеңнең эчке законнарыңны да булдыру мөһим.
Узган уку елы йомгаклары буенча район мәктәпләрендә 118 укучы бик яхшы билгеләргә генә укыды. Аларның барысына да муниципаль район башлыгының рәхмәт хатлары бирелде, анда болай диелә: "Укуга намуслы карашың һәм югары нәтиҗәләргә ирешүең, мәктәп һәм район тормышында актив катнашуың өчен рәхмәт белдерәм. Сиңа нык сәламәтлек, рухи күтәренкелек һәм оптимизм, укуда һәм билгеләнгән максатларга ирешүдә уңышлар телим. Ышанып шуны әйтәм, син лаеклы гражданин булырсың һәм район үсешенә үз өлешеңне кертерсең". Шулай ук фәнни өйрәнү китаплары бүләк ителде.
Олы Салтыктан рәхмәт хатына 4 сыйныфтан Альбина Заһидуллина һәм Алисә Гомәрова, 7 сыйныфтан Адилә Гарифуллина һәм 10 сыйныфтан Гөлия Заһидуллина лаек булды.
Катнашучылар алдында чыгыш ясаучы ТР юстиция министры Мидхәт Корманов алар алдына берничә максат куйды: яхшы белем, компьютерны үзләштерү, чит телләрне белү һәм сәламәт яшәү рәвеше алып бару. Үз сүзләрен ныгытып ул мәктәпкә футбол һәм волейбол туплары бүләк итте. Моннан тыш, линейкада муниципаль район башкарма комитетының мәгариф бүлеге җитәкчесе Илшат Гомәров, Олы Салтык авыл җирлеге башлыгы Хәлим Ибәтов, мәктәп директоры Рөстәм Мәннәпов чыгыш ясады.
Икенче булып Рудник урта гомумбелем бирү мәктәбенә бардылар. Биредә район башлыгы 3 сыйныфтан 10 сыйныфка кадәр 9 балага рәхмәт хаты тапшырды, алар: Элина Сабирова, Алена Володягина, Кирилл Казанцев, Карина Гасс, Данелия Трошина, Валерия Рыбина, Алина Миңнегалиева, Карина Гыйбадуллина, Гөлшат Баймөхәммәтова. Ул тәртипне саклау, тышкы һәм эчке культураны булдыру теләген җиткерде. Бу мәктәпкә дә юстиция министры туп бүләк итеп, сәламәт яшәү рәвеше алып барырга киңәш итте. Линейкада "Кама Тамагы гипс руднигы" ААҖ генераль директоры Сергей Алешин, Тенеш шәһәр җирлеге башлыгы Илсөя Гайнетдинова, мәктәп директоры Румия Хафизова чыгыш ясады.
Аннан соң республика максатлы программасына кереп, җәй дәвамында капиталь ремонт үткәрелгән Красновидово төп мәктәбенә бардылар.
Мәктәп директоры Александр Левин район башлыгына һәръяклап ярдәме, хезмәттәшләре, укучылар, укытучылар һәм ата-аналарга ремонт эшләрендә булышлык күрсәтүләре өчен рәхмәт белдерде. Бу бинага балалар бакчасы, фельдшер-акушерлык пункты күчкән инде. Берникадәрдән җирле үзидарә дә күчәчәк.
Узган елгы нәтиҗәләр буенча ике отличникка: Маргарита Любягина һәм Диана Филатовага рәхмәт хаты тапшырылды. Линейкада шулай ук Красновидово авыл җирлеге башлыгы Владимир Оленин, хезмәт ветераны, элеккеге колхоз рәисе, 30 ел элек бу мәктәпне төзеткән Александр Камонин, ата-аналар исеменнән Ирина Гришина, "Стройград" подрядчы фирма генераль директоры Радик Төхвәтуллин чыгыш ясады.
Уку елы башланды. Хәерле юл!