Халык түземсезлек белән яңа бина ачылуын көтә

Төзелеш эшләренең нинди стадиядә булуын белү өчен без әлеге авылга бардык һәм хәзерге вакытта халык кабул ителә торган һәм фельдшерның эш урыны урнашкан иске медпункт бинасында булдык.

«Сәламәтлек саклау» милли проектының ТР сәламәтлек саклау беренчел звеносын модернизацияләү программасы ярдәмендә Кама Тамагы районында ел саен яңа модульле фельдшер-акушерлык пунктлары ачыла.

ФАП төзелеше турындагы карар нәкъ менә биредә бик актуаль.

Иске бинада үзәкләштерелгән су белән тәэмин итү һәм канализация юк, процедура бүлмәсендә чиләк белән кул югыч тора. Идәннәр тигез түгел, бина үзе кайчандыр агачтан төзелгән булган һәм аны реконструкцияләү мөмкин түгел. Шулай да, ФАП мөдире биредә чисталык саклый һәм халыкны кабул итү өчен уңайлы шартлар булдыру буенча мөмкин булган кадәр барысын да эшли.

Фәридә Закирова 1986 елда Яшел Үзән медицина училищесын тәмамлаган, 3 ел Апас районы участок хастаханәсендә эшләгән, 1989 елдан бирле Иске Барышта яши һәм инде 33 елдан артык биредәге халыкның сәламәтлеге сагында хезмәт куя.

Шуны да әйтергә кирәк, аның телефоны гел шалтырап тора – авылдашлары ярдәм сорап еш мөрәҗәгать итә. Аларның хөрмәтен казанган Фәридә ханым бер урында гына утырып тормый, шулай да, инсульт билгеләре булган хатын-кыз өчен чакыртылган ашыгыч ярдәм машинасын көткәндә, сөйләшеп алу мөмкинлеге булды.

«Балачактан ук табиб булырга хыялландым, һәм хәзер үземне башка эштә итеп күз алдына да китерә алмыйм. Ялларсыз эшлим, телефон һәрвакыт тәүлек әйләнәсе кул астында булырга тиеш, чөнки кешенең теләсә кайсы вакытта, шул исәптән төнлә дә хәле начараеп китәргә мөмкин, шуңа күрә медицина ярдәме күрсәтергә өлгерергә кирәк, эшем җиңел түгел, әмма бу минем тормыш рәвешем һәм мин үз эшемне яратам», – диде Фәридә Фәрит кызы һәм ашыгыч ярдәм фельдшеры белән бергә пациент янына ашыкты.

Авылда, нигездә, аерым игътибар таләп итүче өлкән яшьтәге кешеләр яши. Фельдшер 120 дән артык кешегә хезмәт күрсәтә, әмма җәйге чорда, дача йортларында яшәүчеләр һәм балалар җәйге ялларга кайткач, йөкләнеш арта, һәм, әлбәттә, пациентларны яңа уңайлы бинада кабул итү җайлырак булыр иде.

Без төзелеш мәйданчыгына килгәндә, эшчеләр пандус, баскыч култыксалары һәм болдырны монтажлыйлар иде. Эчке якта эшләр тәмамланган диярлек, ишекләр, асылмалы түшәм, яктырткычлар урнаштырылган, эчке электрика, сантехника, су белән тәэмин итү һәм канализация системалары урнаштырылган. Эчке һәм тышкы якка видеокүзәтү камералары урнаштырылган.  Электр үткәрәсе, тышкы коммуникацияләрне, интернетны җайга саласы һәм территорияне төзекләндерәсе бар. Якты, иркен бүлмәләре булган бу заманча бинада медицина хезмәткәре эше һәм пациентларны кабул итү уңайлылыгы өчен барысы да вак-төяккә кадәр уйланылган. ФАП мөдире һәм Иске Барыш авылы халкы яңа медицина пункты ачылуны түземсезлек белән көтә.