Иң яхшы хат ташучы

"Россия почтасы" өчен даими үткәрелүче һөнәри осталык конкурслары яхшы традициягә әверелде, аларда иң яхшылар гына ачыкланып калмыйча, хезмәттәшләре белән тәҗрибә уртаклашу мөмкинлеге дә була.

Бу бәйгеләрнең максаты - хат ташучыларның хезмәт күрсәтүдә югары культурага һәм эш нәтиҗәләренә ирешүе. Республиканың төрле районнарыннан катнашучы иң көчле егерме почта хезмәткәре арасында, 23 августта Казан шәһәрендә үткәрелгән "Иң яхшы хат ташучы - 2012" конкурсының региональ этабында безнең районнан 9 елдан артык хезмәт стажы булган Кама Тамагы почтамты хезмәткәре Галина Рыжова район данын яклады.