Бу клубта рекордчыларның саны арта бара

«Рекорд-Кама Тамагы» спортчыларының көрәш келәмендә уңышлары белән якташларын сөендерүе беренче ел гына түгел. Клуб тренеры Сергей Федоров үз карамагында тәрбияләнүчеләрнең бу араларда ирешкән уңышлары һәм спорт оешмасының республикадагы эшчәнлеге турында сөйләде.

Сәламәт буын җиңә белә

– «Рекорд» спорт клубының республика территориясендә үз эшчәнлеге географиясен киңәйтүе куанычлы, - дип уртаклашты Сергей Васильевич.  - Әйтик, Тәтеш шәһәрендә спорт клубының ике секциясе ачылды. 29 майда Кама Тамагы һәм Тәтеш самбочылары Буада 2008 елгы һәм аннан кечерәк егетләр һәм кызлар арасында самбо ярышларында катнашты. Бу «Без сәламәт буын» самбо буенча ачык районара турниры иде, анда спортчыларыбыз яхшы нәтиҗәләр күрсәтеп, иң яхшылар булуга иреште. Кама Тамагы татар мәктәбеннән Рамзан Гыйззәтуллинның (авырлык категориясе 31 кг) спортчыларыбыз арасында нәтиҗәсе иң яхшы: ике көрәштә ул зур өстенлек белән җиңде, ә финалда 52 секунд эчендә җиңү яулады, бу аны һичшиксез җиңүгә китерде, Рамзан Идрисов – 28 кг авырлык категориясендә җиңүче, Артур Әхмәтҗанов 28 кг авырлык категориясендә икенче булды, Арслан Идиятуллин – 31 кг категориясендә көмеш, Ярослав Поздняков бронза (28 кг авырлык категориясендә) призер, алар барысы да Кама Тамагы мәктәбеннән. Тәтешлеләр Арсений Лапшин (45 кг), Ярослав Голудец (64 кг) кадет мәктәбеннән икенче урыннарны алдылар, ә 1 нче мәктәптән Матвей Колсанов ярышларның бронза призеры булды.

Спортта районара хезмәттәшлек нәтиҗәлелеккә китерә

Кама Тамагы клубының Александр Колсанов җитәкчелегендәге Тәтеш автомәктәбе, шулай ук Тәтеш кадет интернат-мәктәбе (директоры Вил Нуруллин) белән нәтиҗәле уртак эше бара. Мондый хезмәттәшлек нәтиҗәсендә спорт турнирлары, ярышлар, самбо һәм дзюдога багышланган бәйрәм чаралары үткәрелә. Өстәвенә, ярышлар оештырылып кына калмый, спортчыларны спорт комплексына китерүдә дә ярдәм күрсәтелә. 

Сергей Федоров билгеләп үткәнчә, җәй көне Тәтеш һәм Кама Тамагы районнары самбочылары спорт җыеннарында катнашалар, җыеннар Тәтеш районының матур почмагында – Озын Алан авылындагы тыюлык зонасы территориясендә урнашкан «Чайка» сәламәтләндерү лагеренда уза. Лагерь җитәкчесе Наил Җәгъфәров спортчыларыбызга кирәкле игътибар һәм ярдәм күрсәтү өчен күп көч куя.

Безнекеләр – көрәш келәмендә

Буаның «Батыр» спорт комплексында 2007 елгы һәм аннан кечерәк егетләр һәм кызлар арасында дзюдо көрәше буенча Бөтендөнья балаларны яклау көненә багышланган республика турниры узды. Биредә «Рекорд» АНО әлеге ярышларны оештыручыларның һәм иганәчеләренең берсе иде.

– «Рекорд-Кама Тамагы» спорт клубы самбочылары бу көнне дә уңышлы чыгыш ясады, - диде Сергей Васильевич. - Үз категорияләрендә Ярослав Поздняков, Артур Әхмәтҗанов, Рамзан Гыйззәтуллин турнирның җиңүчеләре булды. Көмеш призерлар – Рамзан Идрисов, Илмир Гаязов һәм Тимур Әхмәтҗанов, бронза призерлар – Матвей Беломестнов һәм Арслан Идиятуллин.

Самбо уңышка илтә һәм сәламәтлекне ныгыта

Мондый турнирлар, һичшиксез, иң көчлеләрне ачыклый, шул ук вакытта яшь спортчыларның осталыгын арттыра. Сергей Васильевич самбочыларның һәм дзюдочыларның ата-аналарына балаларын ярышларга йөрткәннәре, спорт аларның киләчәк уңышлары өчен старт мәйданчыгы булсын өчен шактый көч куйганнары өчен рәхмәт белдерә. 
Бу егет-кызларның барысы да үзләренең киләчәген профессиональ спорт белән бәйләми. Иң мөһиме, «Рекорд» клубында тәрбияләнүчеләр үзләрен һәм якыннарын якларга, тормыштагы гадәти булмаган хәлләрдә тиз һәм дөрес карарлар кабул итәргә өйрәнәләр, шәхеснең күпкырлы үсешенә ярдәм итә торган дисциплиналылык һәм чыдамлык күнекмәләре алалар. 

Шулай ук бу спорт төре уңышка, беренче булырга омтылу һәм көндәшлек сәләтен үстерә, үзеңдә булган куркуларны җиңүдән башлап һөнәри эшчәнлектә һәм шәхси тормышта ышанычлы позициягә ирешүгә ярдәм итә, сәламәтлекне һәм физик халәтне ныгыта. Ә бит безнең гомер озынлыгы да, сыйфаты да нәкъ менә шуңа бәйле…