Сайлауда – яңа технологияләр

- Унбиш сайлау участогында җиһазлар куелды инде, 24 февральгә кадәр бу эшне тәмамларга уйлыйбыз, - диде РУЭС җитәкчесе Газинур Нәбиуллин. - Беренче әзерлек этабы гыйнвар ахырында башланды, без стационар АТСлардан сайлау участокларына кадәр аларга телефон кертү һәм интернет аша тапшыру өчен элемтә линиясе суздык. Икенче этапта ҮСКләренә элемтә каналлары ясыйбыз һәм рөхсәт коды көтәбез. Әлеге эш бөтен Россиядә каналларны тапшыру эше барганга озакка сузыла. Шуңа күрә җавап сигналы шунда ук килми. Өченче этапта камералар һәм шкафлар куела. Әлеге җаваплы эшне инженер-электрончы Илназ Хөснетдинов, авыл элемтәсе инженеры Радик Гыйззетдинов башкара, аларга шоферлар һәм монтерлар булыша. Шимбә бригада Осинникида, Тәмтедәге ике участокта камералар һәм шкафлар куюны төгәлләде. Дәүшәмбе алар Балтач һәм Сөйкидә эшләде. Атна башына 15 сайлау участогы контрольнең яңа алымына әзер.

- Эш күп, әмма җиһазларның урыннарда калуы һәм кешеләр өчен эшләве шатландыра. Кайбер кечкенә авылларда ниһаять интернетка чыгу мөмкинлеге булачак. Узган елда районда 23 километр оптик-җепселле элемтә сузылган иде. Яңа линия Иске Казиле һәм Иске Барышны, Олы Салтык һәм Олы Яңасаланы тоташтырды, ГИСТ программасы буенча Кама Тамагында 8,5 километр сузылды. Эшнең гомуми күләме 4,4 миллион сум тәшкил итте.

Быел без Сөйки-Балтач, Олы Кариле-Чаллы юнәлешендә элемтәне һәм интернет челтәренә тоташу тизлеген яхшырту өчен тыгызлау аппаратурасы сатып алдык. Җиһазлар тоташтырылды һәм файдалануга тапшырылды, сайлаулардан соң ул халыкны сыйфатлы элемтә белән тәэмин итү өчен кулланылачак. Кечкенә авылларда гражданнар җыелышларында интернет челтәренә тоташу мөмкинлеге булмау мәсьәләсе еш күтәрелә иде. Ишем, Мордва Каратае, Даныш, Варварино, Рус Бортасларында әбүнәчеләргә яңа мөмкинлекләр ачачак һәм Кече Карамал, Кече Мәрәтхуҗа, Атабай, Кыртапа халкына элемтә сыйфатын яхшыртачак МС-04 җиһазы сатып алынды. Быел без шулай ук Куйбышев Затонга альтернатив телефон кертә башлаячакбыз.