Укучыдан укытучыга

Күп тә үтми, язмыш көтелмәгән борылыш ясаган: яшь кешегә кайчандыр үзе укыган Затон урта мәктәбендә эш тәкъдим иткәннәр. Укытучы булу өчен Дмитрий ТИСБИда квалификация үзгәртү курсларын уңышлы узган. Шулай итеп, аның яңа профессиональ карьерасы башланган.

Бүген, ике ел узгач, 23 яшьлек Дмитрий укытучылык эшчәнлеген дәвам итә. Башта ул технология дәресләре алып барган, хәзер физикадан белем бирә.

«Укытучы булу теләге мәктәптә укыганда ук барлыкка килде, - ди Дмитрий. - Укытучылар көне уңаеннан үткәрелгән үзидарә көннәрендә үземне укытучы ролендә сынап караганым булды. Шул чакта бу һөнәрнең никадәр катлаулы һәм бер үк вакытта кызыклы булуын аңладым. Шуңа да карамастан, үземне башка өлкәдә сынап карарга булдым, ләкин язмыш мине яңадан йөрәк кушкан урынга алып килде». 

Быел Дмитрий «Ел укытучысы» бәйгесенең муниципаль этабында «Педагогик дебют» номинациясендә җиңүче булды һәм зона турында катнашты.

«Миңа балалар белән эшләү һәм безнең уртак тырышлык нәтиҗәсендә аларның уңышларга ирешүләрен күрү ошый, - дип сүзен дәвам итте Дмитрий. - Күп кенә яшь укытучылар кебек үк, миңа да авырлыклар белән очрашырга туры килде: башта укучылар мине җитди кабул итмәделәр. Әмма тора-бара без уртак тел таптык, һәм мөнәсәбәтләр җайга салынды».

Хәзер педагог үзенең укучылары белән бергә район һәм республика чараларында актив катнаша.