Район юлларында

Бүгенге көндә Яңа Сала һәм Шәпкә авылларына илтүче юлның өчтән ике өлешенә яңа асфальт җәелгән.

– Участокның озынлыгы – 12 километр, шуның 7 километры ремонтланды, билгеләнгән срокларда без бу участокта эшне төгәлләячәкбез, - дип хәбәр итте газетага юл хезмәте идарәсе җитәкчесенең урынбасары Илнар Дәүләтшин. - Бу күчмә объект, киләсе елда Кама Тамагы-Апас трассасыннан Яңа Сала борылышына кадәрге участокны ремонтларга планлаштырабыз.

“Эшчеләрнең бер өлеше икенче участокка күчте. Быел Архангель Келәре авылында 475 погонлы метр озынлыкта яңа юл салыначак, - диде идарә җитәкчесе Рамил Ганьятуллин. – Бу участокта ком һәм вак таш түшәләчәк, аннары юл өслеген тыгызлау эше башкарылачак. Бу юлны тигезләү һәм аның буйлап елның теләсә кайсы фасылында узу мөмкинлеге бирәчәк.