Программаларның гамәлдә булуы дәвам итә

Чыгымнарның бер өлешен каплау буенча юнәлешләр арасында: савым сыерлары, кәҗәләр һәм өч яшьтән өлкәнрәк бияләр асрауга; чебеш-бәбкәләр сатып алуга; товар һәм нәселле таналар һәм бер тапкыр бозаулаган сыерлар сатып алуга; сөтчелек юнәлешендә мини-фермалар төзүгә субсидияләр бар. Шулай ук «Агростартап», «Гаилә фермасы», «Агротуризм», авыл хуҗалыгы кулланучылар кооперативларының матди-техник базасын үстерү буенча грант программалары да гамәлдә.

Район авыл хуҗалыгы һәм азык-төлек идарәсе белешмәләре буенча, грант программалары гамәлдә булган чорда районда утыз эшмәкәргә 65 млн сумлык субсидия бирелгән.

– Районда шулай ук 35 КФХ төзелде, алар үсеш буенча ярдәм алды, - ди авыл хуҗалыгы һәм азык-төлек идарәсе белгече Равил Дәминов. – Бүген 25 крестьян-фермер хуҗалыгы эшли. Әмма безнең районда иң кирәкле программа – «Мини-фермалар төзелеше». Программа гамәлдә булган чорда ярдәм суммасы 120 меңнән 600 мең сумга кадәр артты. Районда барлыгы 30 мини-ферма төзелде, авыл халкына 7 миллион дәүләт ярдәме күрсәтелде. Быел бу программада районыбызның ике шәхси ярдәмче хуҗалыгы катнашты. Киләсе елга тагын 4 шәхси ярдәмче хуҗалык гариза тапшырган.

Шулай ук шәхси ярдәмче хуҗалык башлыклары ел саен сыерлар, кәҗәләр һәм бияләр асрау буенча да ярдәмнән файдалана. Агымдагы елда терлекчеләр 4,4 миллион сумлык субсидия алган. Шуны истә тотарга кирәк: субсидия алу өчен программаның барлык шартларын да үтәү мөһим.

Киләсе елга «Агростартап» грант программасына районда яшәүче өч кеше гариза тапшырырга ниятли. Тагын биш кеше «Агротуризм» грант программасында катнашырга планлаштыра, алар арасында фермерлар һәм туризм өлкәсендә эшләүче эшмәкәрләр дә бар. 

Яңа елдан Татарстан Республикасы Авыл хуҗалыгы министрлыгында авыл хуҗалыгы җитештерүчеләренә ярдәм программаларында катнашу буенча гаризалар янә кабул ителә башлаячак. Район авылларында уңайлы шартларда арендага алырга мөмкин булган буш терлекчелек биналары, пай җирләре һәм, терлек асрау тәҗрибәсе булуны исәпкә алып, эшкә яраклы яшьтәге авыл кешеләренең программаларда катнашу һәм авылда кече бизнесны үстерү өчен ярдәм алу мөмкинлеге бар.