Идел таңнары

Кама Тамагы районы

18+
Рус Тат
2024 - Гаилә елы
Җәмгыять

Поселок төзек булсын!

Территориаль-иҗтимагый үзидарәләр арасыннан безнең районда иң беренче булып «Южная Околица» барлыкка килде. Аны микрорайонда Юрий Ильин төзеде һәм иҗтимагый үзидарә эшен оештырды.

Ул бу эшне район күләменә күтәрә – районның барлык җирлекләрендә ТИҮлар булдырырга ярдәм итә. Аларның күбесе хәзер дә актив эшли, конкурсларда катнашалар, үз авылларын һәм поселокларын төзекләндерүгә субсидияләр алалар.

Кама Тамагы өчен бер генә ТИҮ аз булу аз иде. Шуңа күрә Юрий Александрович бу эш белән башка микрорайоннарда шөгыльләнә алырлык актив кешеләрне эзләде. Шундыйларның берсе – Сергей Гранцов, ул үз урамында чокырны һәм чишмәне төзекләндерү белән шөгыльләнде. Юрий Александрович аңа төзекләндерелгән территориядә балалар мәйданчыгы урнаштырырга ярдәм итә, бу хакта безнең газета да язган иде. 

Ә менә поселокның бөтен тарихи үзәген берләштергән ТИҮне шулай ук Ильин ярдәме белән Татьяна Азанчеева оештырды.

– Барысы да безнең урамның (берничә ел эчендә ул атамасын өч тапкыр үзгәртте: Мелиораторлар, Гагарин, Якты урамнары дип аталды) каты өслексез булуыннан башланды, яз-көз аның буйлап йөри торган түгел иде, – диде Татьяна Владимировна. – Мин, район башлыгына мөрәҗәгать итеп, урамны программага кертү өчен имзалар җыя башладым. Һәм урамыбызга асфальт түшәделәр, моның өчен без, үтенечләребезне ишеткәне һәм ярдәм иткәне өчен, район җитәкчелегенә рәхмәтле.

Бу тәҗрибә шуны күрсәтте: әгәр дә без нәрсәнедер үзгәртергә, үзебез өчен, урамыбыз яки микрорайоныбыз өчен нидер эшләргә телибез икән, социаль челтәрләрдә хакимиятне сүгеп утырырга кирәкми. Барлык оешма ишекләренә шакып кына калмыйча, үзеңә дә эшкә тотынырга кирәк. Юрий Александровичның бу фикерләре һәм киңәшләре ТИҮ оештырырга этәрде, без аны «Богородское» дип атадык. Безнең иҗтимагый-территориаль үзидарә 2021 елның июнендә теркәлде. Аңа 20 урам керә, аларда район үзәгенең 1800 гә якын кешесе яши. Арада иң зурлары: Карл Маркс, Гагарин, Чирков һәм Коммуналь урамнары.

Шунысын да билгеләп үтәргә кирәк, ТИҮ Кама Тамагы штп башкарма комитеты белән бик тыгыз хезмәттәшлек итә һәм һәрвакыт аның хезмәткәрләренә ярдәмгә килә. Бу нигездә поселокны төзекләндерүгә, җәйге чорда урамнарда үлән чаптыруга, куакларны һәм Америка өрәңгесен кисүгә кагыла.

Узган җәйдә Гагарин урамындагы җәяүлеләр күпере янындагы территорияне чистарту буенча зур эш башкарылды. ТИҮ гуманитар ярдәм җыюда, окоп шәмнәре ясауда актив катнаша. Моннан тыш, аның әгъзалары беркетелгән территориядә яшәүче юбилярлар турында да онытмый. Алар 80 һәм 85 яшькә җиткән өлкән кешеләргә бүләкләр тапшыра, җирлек хезмәткәрләре белән бергә 90 һәм 95 яшьтән узган юбилярларны котлауда катнашалар. Узган ел район үзәгендә яшәүче 28 кешегә һәм алтын туйларын билгеләп үткән дүрт гаилә парына бүләкләр тапшырганнар.

– Без республиканың иҗтимагый-территориаль үзидарәләре арасында уздырыла торган бәйгеләрдә инде икенче ел катнашабыз. Беренче елда конкурс шартлары буенча гариза тапшыра алмадык, узган ел призлы урынны «Южная Околица» ТИҮ алды, быел без нәтиҗәгә өметләнәбез. Быелдан башлап конкурска гаризаларны һәм фотоматериалларны электрон рәвештә тапшырырга була. Бу безнең эшне җиңеләйтә, материалларны да тизрәк җибәрергә мөмкинлек бирә. 

20 урамнан тыш, ТИҮ территориясенә зират кергән, аңа даими игътибар кирәк. Территориядә юлны төзекләндерү мөһим. Шулай ук күлләребезгә игътибар итәргә телибез. Поселокта алар күп һәм барысы да ташландык хәлдә. Аларны чистартырга, ярларын төзекләндерергә кирәк. Эшлисе эшләр күп, халык безгә ярдәм итәр һәм барыбыз бергә поселогыбызны үзгәртә алырбыз дип өметләнәбез.

Следите за самым важным и интересным в Telegram-каналеТатмедиа


Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев