Планнар һәм өметләр белән яшәүче Дарья Лягина һәр көн өчен язмышына рәхмәт укый

Бәла рөхсәт сорап килми, ул кинәт кенә бәреп керә, шатлыктан мәхрүм итә һәм кайчак төшенкелеккә сала. Һәм бу вакытта иң мөһиме – бирешмәскә, чиксез батырлык, рух көче тупларга, яңа чынбарлыкны кабул итәргә һәм, бернигә дә карамастан, бәхетле булырга омтылырга кирәк. Дарья Лягина нәкъ шулай итә дә.

Ул Тәмтедә үскән, шундагы мәктәпне тәмамлаган, аннары Тәмте һөнәр училищесында пешекче һөнәре алган. Укуын тәмамлагач, әбисе Мария Ванеева янына Кадыш авылына китә, анда фермага урнаша, сыерлар карый башлый. Мария Францевна Дарьяга үз әбисе булмаса да, аның өчен бик якын кеше була һәм ул аңа зур тормышта беренче мөстәкыйль адымнарын ясарга ярдәм итә. Аннары Дарья Мәскәүгә китә, анда 13 ел яши, әмма бәхетсезлек очрагы аны туган авылына кайтырга мәҗбүр итә.

- Мин инде коляскада беренче ел гына түгел, ләкин барыбер тормыш, шатлыклы мизгелләр синең физик халәтеңә бәйле түгел бит, - ди әңгәмәдәшем. - Мин барлык якыннарыма һәм социаль хезмәткәрем Ольга Зотовага көндәлек ярдәмнәре өчен рәхмәтлемен.

Дарья әле дә хыяллар белән яши: балачактан ук комбайнда эшләргә теләгән. Пешекчегә укыган вакытта ул ашханәдә эшли, басуларга механизаторларны ашатырга чыга һәм андагы атмосферага сокланган. Руль артына утыру теләге еллар дәвамында беркая да юкка чыкмаган.

Әгәр бер нәрсәне бездән Алла тартып ала икән, ул алмашка һичшиксез икенчесен бирә, һәм бу очракта бу алтын куллар. Дарья ярты ел элек креатив иҗат белән мавыккан һәм бик теләп балавыздан декоратив шәмнәр, гипстан кашполар ясый, сабын кайната. Һәр детальгә ул күңелен сала, һәр сынны мөстәкыйль рәвештә буйый. Безнең героиняның планнарында: тернәкләнүгә җыю өчен акча эшли башлау һәм яраткан һөнәрендә үсешен дәвам итү.

Дарья Лягина тарихы – авыр хәлдә иң мөһиме бирешмәскә, яңа чынбарлыкны кабул итәргә һәм хыялыңны тормышка ашыру юлларын эзләргә кирәклеген искә төшерү.