Матур җырлар һәм шат кәеф – гомернең бер бизәге

Россиядә Халыкара Өлкәннәр көнен 1 октябрьдә 1992 елдан бирле билгеләп үтәләр, һәм районның авыл-поселокларында яшәүчеләр зирәклек һәм игелек бәйрәменә багышланган чараларга җыелалар. Бу юлы да район мәдәният йортында күңеле белән яшь иҗат сөючеләр өчен «Өлкәннәр йөрәкләре белән яшьләр» дигән концерт булды. Залда да, сәхнәдә дә өлкәннәр иде.

Актив һәм тормышка битараф булмаган кешеләр

Мәдәният йорты фойесына кергәндә үк, туган якны өйрәнү музее һәм үзәк китапханәнең Өлкәннәр көненә багышланган күргәзмәләре – боегу белмәс һәм хезмәт сөючән, героик кешеләр турында фотосурәтләр, альбомнар һәм китаплар күрсәтелде. 
Бу көнне район мәдәният йортына якташларының иҗатына битараф булмаган шундый ук актив Кама Тамагы кешеләре килделәр, күбесенең үзләренең дә, мәсәлән, Вера Колударова, Татьяна Мозаффарова, Рәшит һәм Флюра Хәйруллиннар кебек, газетабыздагы мәкаләләрнең геройлары булганы бар. Залда бистә кунаклары да бар иде: Зөләйха Яруллина һәм ирле-хатынлы Закировлар Казаннан «Кама таңнары» коммерцияле булмаган автоном оешмасына ял итәргә килгәннәр. Зөләйха апа, пенсиягә чыкканчы, 16 нчы номерлы моторлар төзү заводында эшләгән, ә Сания Закирова 48 ел санаторий системасында хезмәт куйган. Аның ире Рәшит абый Залесныйдагы совхозда тимерче булган, хәзер дә пенсионерлар актив тормыш белән яшиләр. Кунакларыбыз дәвалау процедураларын үтеп кенә калмыйча, Лобач тавында, Юрий мәгарәсендә, Озын Аландагы Молоствовлар утарында экскурсияләргә дә булырга өлгергәннәр. Алар безнең төбәкнең матурлыгын да, мондагы кешеләрне дә ошатканнар…

Яшьләре генә түгел, талантлары да алтын

Ә залда инде баян моңнары яңгырый башлады, берәү генә дә түгел – сәхнәгә Әнәс Мәһдиев җитәкчелегендәге баянчылар ансамбле чыкты, аларга кушылып Суфия Гобәйдуллина җырлады, үз чыгышлары белән һәр тамашачыга җылылык һәм ихласлык бүләк иттеләр.
Район башлыгы Наил Вазыйхов һәм ТР Гражданнар оборонасы эшләре һәм гадәттән тыш хәлләр министры вазыйфаларын вакытлыча башкаручы Николай Суржко бу бәйрәмнең өлкән яшьтәгеләр түгел, алтын яшьтәге кешеләр бәйрәме булуын билгеләп, аларга сәламәтлек һәм иминлек теләделәр.
Ә концертны алып баручылар Лера Киселева һәм Гөлназ Ибраһимова «Вересень» рус халык хорын сәхнәгә чакырды, анда катнашучыларның күбесе «алтын яшьтәгеләр» генә түгел, алтын иҗатка ия талантлы кешеләр дә, тамашачылар моңа һәрчак инана.
Ренат Закиров һәм Александр Шалаев тантана «гаеплеләрен» җырлары белән сөендерделәр, алар залда утыручыларның һәркайсына аңлаешлы иде, чөнки бу җырлар мәхәббәт, игелек, әти-әни һәм туган йорт турында…

Яхшылыкка өмет яшькә бәйле түгел

Антоновкадан Марат һәм Наталья Сәхибгәрәевлар Гаилә елы уңаеннан «Өй туе» спектакленнән үзенчәлекле күренеш күрсәттеләр, кызыклы һәм гадәти булмаган чыгыш өчен рәхмәтле тамашачыларның җылы алкышларына лаек булдылар.
Талантлы Римма Исмәгый- лева иҗади конкурслар лауреаты гына түгел, тамашачыларның яраткан җырчысы да. 
Менә сәхнәгә янә «Вересень» хоры аккомпаниаторы Александр Захаров, ә аннары «Илһам» ансамбле катнашучысы Айрат Кадыйров чыкты. Бу юлы музыкантларның ялгыз чыгыш ясады, бу исә тагын бер бүләк булды.   
Һәм менә Римма Исмәгыйлева башкаруындагы «Бәхет телим сезгә, бәхет!» җырына сәхнәгә концертта катнашкан артистлар чыкты, ә тамашачылар, аягүрә басып, тормышны ничек бар шулай кабул итәргә һәм шул ук вакытта, яшькә карамастан, яхшылыкка өметләрен югалтмаска мөмкинлек биргәннәре өчен аларга чын күңелдән рәхмәтләрен белдереп, алкышлар бүләк иттеләр…