«Матбугат сүзенә һәрчак ышандык»

Аның әтисе Миңвәли сугыш чорында оборона заводында эшләгән, 1954 елда гына әйләнеп кайткан. Сугыштан соң ир-атларга җиң сызганып эшләргә туры килгән. Алар арасында Миңвәли Нәҗмиев та була. Хатыны фермада эшләгән, өйдә дә мал-туар күп асраганнар, шуңа күрә олыларга гына түгел, балаларга да эш җитәрлек булган.

– Мин гаиләдә иң олысы, - ди Фирдәвес апа. - Шуңа күрә эшнең күбрәге миңа эләкте. Бик тә шәһәргә китәргә теләдем, башка тормыш турында хыялландым. Әмма гомерем буе Келәнчедә яшим һәм эшлим. Бухгалтерлыкка укыдым да колхозда эшли башладым. Әтиебез һәрнәрсәдә безгә үрнәк булды – эштә актив хезмәткәр, йортта булдыклы хуҗа, өстәвенә, ул әле үзешчән сәнгатьтә дә катнашты. Бәлки, шуңа күрәдер сеңлем Гөлсем үзенең хезмәт тормышын мәдәният белән бәйләде, 40 елдан артык авыл клубы мөдире булып эшләде.
Әтинең йогынтысы миңа да булды. Мин, аның кебек үк, авыл советын җитәкләдем һәм, күбрәк секретарь булып эшләсәм дә, авылыбызның көнүзәк мәсьәләләрен хәл итеп, гомерем буе диярлек биредә эшләдем.

Бигрәк тә 70-80 елларда – теләсә нинди ялгышлык партия райкомы бюросында каралганда эшләве кыен булды. Кайвакыт хаклы рәвештә эләкте, ләкин оператив эш өчен орышсалар, хәтер кала иде. Бервакыт районга арыш оны китерделәр, аны сатарга кирәк булды. Башка авыл советлары уйлаган арада, без бөтен онны алып саттык, ә миңа шелтә белдерелде.
Сәламәтлегем белән проблемалар килеп чыккач, китәргә теләгән идем, әмма Нурания Кәримулла кызы Зиннәтуллина мине җибәрмәде, дәвалануда ярдәм итте һәм секретарь булып калырга күндерде. Шул рәвешле, пенсиягә чыкканчы, мин биредә эшләдем.

Фирдәвес апа бүген дә туган авылы һәм районы өчен җан атып яши, Иван Маховикның туган як турындагы язмаларыннан китап чыгарылсын иде дигән теләген җиткерде. Авыл яшәсен, сугыш һәм хезмәт Геройлары истәлеге саклансын өчен барысын да эшләүче якташлары белән горурлана.

– Без һәрвакыт район газетасын алдырдык, - ди ул. - Әти-әниебез дә аны укыды, без дә кечкенәдән җирле матбугатны укып үстек, матбугат сүзенә ышанабыз. Якташларыбыз турында язмаларны укып куанабыз.