Казанда татар абыстайлары форумы үтте

Әлеге чарада Татарстанның 39 мөхтәсибәтеннән мөслимәләр берлеге җитәкчеләре, шулай ук Казан мәчетләрендәге баш абыстайлар – барлыгы 100 мөслимә килде. Катнашучылар арасында Безнең районның мөслимәләр берлеге җитәкчесе районның баш абыстае Мөнирә апа Хәлиуллина да бар иде. Форумның төп темасы – мөселман гаиләсенең тотрыклылыгын һәм асылын саклау, яшьләрне гаилә коруга һәм балалар тудыруга өндәү, аерылышучылар санын киметү. Форумда төп доклад белән Нәзарәтнең хатын-кызлар белән эшләү бүлеге һәм Татарстан мөслимәләр берлеге иҗтимагый оешмасы җитәкчесе Наилә ханым Җиһаншина чыгыш ясады. Ул хәзерге абыстайларның эшчәнлегенә тукталды һәм аларның төп башлангычларын мәшһүр татар хатын-кызлары казанышлары белән чагыштырды.  Наилә ханым, 26 актив абыстайның күп еллык хезмәтләрен билгеләп, аларга Рәхмәт хатлары һәм мөфти исеменнән “Казан басмасы” мүсхәфләрен тапшырды.