Казанда «АЛТЫН ТАШБАКА» фестивале узачак

2026 елның 12 мартыннан 26 апреленә кадәр Казан шәһәрендә, Татарстан Республикасы Милли китапханәсендә (Пушкин ур., 86) «АЛТЫН ТАШБАКА» - goldenturtle.ru Халыкара кыргый табигать фестивале узачак. 

Фестиваль — кыргый табигать фотографиясе өлкәсендә 20 еллык тарихы булган Россиядәге иң масштаблы мәдәни һәм экология-агарту вакыйгасы.

Уникаль күргәзмәдә дөньяда әһәмияте буенча икенче урында торучы кыргый табигать фотоконкурсы финалистларының 120дән артык эше тәкъдим ителәчәк. Алар арасында «Тыюлыклы Россия» махсус фотоколлекциясе, шулай ук «Мәскәүнең кыргый табигате» номинациясе эшләре бар. Экспозициядә «Ак китап» махсус проекты кысаларында сукыр һәм начар күрүче кунаклар өчен махсус тактиль техникада башкарылган фотолар да урын алачак.

Фестиваль традицион рәвештә мәктәп укучылары белән актив эшли: Татарстан Республикасының 2000 укучысы өчен экология-танып белү экскурсияләре үткәреләчәк.