Кадетлар ант итте

Тантана Ватан Геройлары көне алдыннан узды.

Ул дәүләт флагларын күтәрүдән, гимннан һәм мәктәп байрагын алып чыгудан башланды. Кадетлар намус кодексын һәм ширкәт законнарын төгәл үтәргә ант иттеләр.

Кадетлар бергәлегенең яңа әгъзаларын котларга башкарма комитет җитәкчесе Ринат Заһидуллин, мәгариф идарәсе җитәкчесе Елена Гыймадиева, хәрби хәрәкәтләр ветераны полковник Александр Мещанов, хәрби комиссар урынбасары Рамис Дәүләтшин килде. Алар барысы да яңа кадетларга теләктәшлек белдерү өчен мөһим сүзләр таптылар: «Ир-егетләр һәрвакыт Ватаныбыз сагында тордылар. Бүген сез бу эстафетаны Россия геройларыннан, барыннан да элек илебезнең иминлеге турында уйлаучылардан кабул итәргә әзерләнәсез», - диде алар.

Быел кадет мәктәбенә бишенчедән алып унынчыга кадәр төрле сыйныфларга 29 яңа укучы килгән. Ләкин тормышларындагы мөһим вакыйгаларның берсенә аларның барысы да кертелмәгән.

- Бүгенге ант итүдә өч ай эчендә укуда, спортта, сафка әзерлектә үзләрен яхшы яктан гына күрсәткән, дисциплинаны бозмаган егетләр катнаша, - диде педагог Татьяна Компаненко. – Бу юлы байрак янына чыкмаганнарның тәртипләрен төзәтү һәм 23 февральдә Ватанны саклаучылар көненә багышланган тантаналы линейкада ант итү мөмкинлекләре бар. 

Чарада кадет мәктәбенең тигез сафы өстендә беренче тапкыр квадрокоптер күтәрелде. Быелдан башлап мәктәптә әлегә түгәрәк кысаларында балалар пилотсыз очкыч белән идарә итәргә өйрәнәләр. Педагог-тәрбияче Равил Бәхтияровның актив укучыларының берсе Виктория дронны мәктәпнең спорт залында очыртып җибәрде.

– Мин Биектау районыннан, биредә икенче ел укыйм. Монда педагоглар көчле, алар төпле белем бирә, моннан тыш, мәктәптә төрле өлкәләрдә үсеш алу өчен мөмкинлекләр күп, - ди ул.

Традиция буенча чарага яңа укучыларның, дулкынлануларына карамастан, балалары белән горурланучы ата-аналары да килгән иде.

Кадет мәктәбе директоры исемнәргә лаек булган кадетлар исемлеген игълан итте. Мәктәптә алар ефрейтор һәм вице-ефрейтор, кече һәм өлкән сержант дәрәҗәләренә кадәр «хезмәт итә» ала. Болар бары кадетлар бергәлегендә генә гамәлдә булса да, бу егетләрнең коллективтагы уңышларын рангларга мөмкинлек бирә.

Байракны чыгарыр алдыннан кадетлар спорт залы буйлап сафтагы адымнар белән үттеләр. Бу бик тамашалы мизгел иде.

Чара ахырында кадетлар, бигрәк тә иң кечкенәләре – 5 сыйныф укучылары әти-әниләре белән кочаклаштылар, истәлеккә фотосурәтләргә төштеләр.