Юл ыгы-зыгыны һәм ваемсызлыкны яратмый

Берләшкән милләтләр оешмасы юл хәрәкәтендә катнашучыларның гомерен һәм сәламәтлеген саклау проблемаларына җәмгыятьнең игътибарын җәлеп итү максатыннан ноябрьнең өченче якшәмбесенә Бөтендөнья юл-транспорт һәлакәтләре корбаннарын искә алу көнен билгеләде. Быел бу датаның 30 еллыгы билгеләп үтелә.

ТР ЮХИДИ мәгълүматлары буенча, 10 ай эчендә республика территориясендә 389 юл-транспорт вакыйгасы булган, аларда 16 бала һәлак булган һәм 403 е яраланган. Узган елның шул ук чоры белән чагыштырганда, хәл шактый кискенләшкән. Юл-транспорт һәлакәтләре 25 очракка, яраланган балалар саны 18 гә, һәлак булган балалар саны 5 кә, ягъни 1,5 тапкыр арткан. Һәлак булган балаларның 11е – пассажир, 5 се җәяүле булган. Юл-транспорт һәлакәтләренең 78% ы машина йөртүчеләр гаебе белән килеп чыккан.
Район юллары буйлап узганда, юл кырыйларында чәчәкләр һәм веноклар белән бизәлгән һәйкәлләрне күрергә мөмкин, алар юл-транспорт вакыйгасында һәлак булган кешеләрнең әлеге урынга каны тамганы турында искәртеп тора.

Югары Ослан ЮХИДИ мәгълүмат-лары буенча, быелның ун аенда район юлларында зыян күрүчеләр катнашында 5 юл-транспорт вакыйгасы булган, аларда 6 кеше яраланган, берсе һәлак булган.

– Гыйнвар, апрель, июль һәм август айларында автомобильләр бәрелешү нәтиҗәсендә 5 кеше яраланган һәм бер шофер һәлак булган, - дип хәбәр итте ЮХИДИ дәүләт инспекторы Павел Калмыков.  - Шулай ук июль аенда бер җәяүле таптатыла, нәтиҗәдә ул яралана. Төп кагыйдә бозулар: юл йөрү чиратлылыгын, ян интервалын үтәмәү, дистанцияне дөрес сайламау, юл аркылы чыгу максаты булмаган килеш юл уртасында булу.

Узган ел район территориясендә зыян күрүчеләр катнашында 9 юл-транспорт һәлакәте булды, аларда 7 кеше яраланды һәм ике кеше үлде. Юл хәрәкәте кагыйдәләрен бозу: каршы хәрәкәт полосасына чыгу, юл аркылы чыгу максаты булмаган килеш юл уртасында булу, тизлекнең конкрет хәрәкәт шартларына туры килмәве, транспортның юлда урнашу кагыйдәләрен, пассажирларны йөртү кагыйдәләрен бозу. 

Кама Тамагы-Затон һәм Заовражный Каратай-Уразлино юллары киселешендәге участок турында язганыбыз бар. Соңгы вакытта монда икенчел юлдагы машина йөртүчеләренең түземсезлеге нәтиҗәсендә автомобильләр бәрелешү очраклары еш була. Онытмагыз, төп юл – Кама Тамагы-Затон. Бу юлдагы транспорт Каратай һәм Уразлино ягыннан чыгучы транспорт алдында өстенлекле. Махсус билгеләр урнаштырылган юлда кагыйдәләрне үтәп хәрәкәт итү генә күңелсез һәм куркыныч хәлләрне булдырмаска ярдәм итәчәк.