Яхшы мәгънәдә үзсүзле

Рамил үзе урында юк иде, әмма аның ярдәмчеләре цехта эшнең ничек оештырылганлыгы турында горурлык белән сөйләде.

– Әлегә юллар ябык һәм без заказчыларга әйберләрне җибәрә алмыйбыз, - ди Олы Карамалдан Рөстәм Хәмитов. 

Чыннан да, транспортны көтеп, юл кырыена аскуймалар тезелгән.

– Менә инде ике йөк машинасы әзер, - дип сүзен дәвам итте әңгәмәдәшем. - Рамил тырышып эшли, эшне җиңеләйтә һәм тизләтә торган яңа җайланмалар сатып ала. Мин, аның ярдәмчесе белән бергә беренче аскуймаларны кулдан җыюларын күргәч, озак эшләмәс, ябылыр дип уйлаган идем. Ә ул бик үзсүзле булып чыкты, эшен дәвам итте һәм аны елдан-ел үстерә. Авылда шундый эшчән, яхшы мәгънәдә үзсүзле ир-ат булуга шатмын. Кешеләр аңа тартылалар, бик теләп ярдәм итәләр. Хәтта тагын бер пилорама сатып алу мәсьәләсе барлыкка килде, чөнки бер пилорамада без бер-беребезгә комачаулыйбыз.