Ярты гасыр бергә: һәрвакыт бер-берсенә терәк булып

 Без юбилярларда кунакта булдык, биш дистә елдан соң гаиләдә мәхәббәт һәм үзара ихтирамны, бер-береңә ышанычны ничек сакларга, ничек үзара аңлашып яшәргә булуы турында кызыксындык. Барысы да ерактан – туган нигездән башлана.

Фронтовик гаиләсе, Ерак Көнчыгыштагы хәрби хезмәт һәм хезмәт юлын башлау

Рашат Кәрим улы Иске Барыш авылында 1943 елда авыр яралану нәтиҗәсендә сугыштан кайткан фронтовик Кәрим Җиһаншин гаиләсендә туган. Әтисе, сугыш инвалиды булса да, эшсез утыра алмаган, тракторчы булып эшләгән: сугыш һәм сугыштан соңгы чорда ирләр җитми. Әнисе Шәмсенур Заһидулла кызы да сугыш вакытында трактор руле артына утырган: «Барысы да фронт өчен, барысы да җиңү өчен!»

Гаиләдә дүрт ул үскән, кечкенәдән хезмәт белән тәрбияләнгәннәр. Сигезьеллык мәктәпне тәмамлагач, Рашат Казанга киткән, анда 7 нче «Элекон» заводына урнашкан. Заводта ук эшкә өйрәнеп, слесарь-җыючы булып хезмәт куйган.

Армия хезмәтен Ерак Көнчыгышта Амур өлкәсендә үткән. Ике елдан туган авылына кайткач, участковый Фәрит Йосыпов аңа район милиция бүлегендә эшләү тәкъдиме белән мөрәҗәгать иткән.

- К. Маркс урамындагы иске РОВД бинасы әле дә искә төшә, мин анда күп еллар эшләдем, - ди Рашат Кәрим улы.- Ул чакта җитәкче Николай Николаевич Шестанов иде.

Шулай итеп, язмабыз герое 1973 елның декабрендә патруль хезмәтенә милиционер булып урнаша һәм Кама Тамагына күченеп яши башлый. Тора-бара җаваплы хезмәткәр буларак, аны паспорт өстәленә эшкә күчерәләр.

Балачагы – Южная Околицада, хезмәт тормышы – дәүләт банкында

Ә Наилә Наил кызы Кама Тамагында туган, җәйләрен Южная Околицада әбисе янында үткәргән. Аның әти-әнисе – Наил һәм Миңнеруй Зиннәтуллиннар навигациядә эшләгәннәр, шуңа күрә кызны әбисе караган. Аннары әтисе гипс төяү буенча кранда эшли башлаган, әнисе матрос булган, һәм гаилә рудникка күченгән. Биредә Наилә балалар бакчасына йөргән, аннары сигезьеллык мәктәпне уңышлы тәмамлаган. Казан исәп-кредит техникумына укырга кергәч, 1973 елда аны тәмамлаган һәм туган бистәсенә кайткан, анда дәүләт банкына бюджет буенча өлкән бухгалтер булып эшкә урнашкан.

Язмышны хәл иткән очрашу

Менә, ниһаять, язмабыз геройларының язмышлары хәл ителгән очрашуы турында сөйләр вакыт җитте. Бу 1975 елда Рашатның дусты Илгизәр Сабировның туенда була. Туй Южная Околицадагы Дуслык урамында җырлар белән гөрләп бара, яшь егет туйга кияү ягыннан туган буларак килгән Наиләне шунда ук күреп алган. Кызга – 20, егеткә – 23 яшь. Очраша башлыйлар, һәм бер елдан Кама Тамагында никахлары теркәлә, ә Иске Барыш авылында күңелле итеп туй үткәрәләр, аңа кияү ягыннан да, кәләш ягыннан да күп санлы туганнар җыела.

Һәрвакыт бер-берсенә терәк булып

Яшь гаилә башта арендага алынган фатирда яшәгән, аннары аларга Көньяк Околицадагы Ак йорт дип аталган йорттан фатир биргәннәр, ә тора-бара Якты урамында үз йортларын төзегәннәр. Тормыш үз җае белән барган, гаиләдә уллары Айрат һәм Илнур үсеп җиткәннәр.

90 нчы еллар, илдә үзгәрешләр чоры була. 1998 елда Наилә Наил кызы “Ак барс” банкына эшкә күчә, анда ярты ел директор урынбасары булып эшләгәннән соң, банкка җитәкчелек итә башлый. 

Районда Федераль казначылык филиалы барлыкка килгәч, аны әлеге финанс учреждениесенә кабул итәләр, ул пенсиягә чыкканчы шунда хезмәт куя.

- Без һәрвакыт туган районыбызда яшәдек һәм эшләдек, – дип елмая Наилә ханым.

Рашат Кәрим улының хезмәт биографиясе тормыш иптәшенең сүзләренә дәлил: ул патруль хезмәтендә һәм паспорт өстәлендә генә түгел, районның ведомстводан тыш сагында да, эчке эшләр бүлегенең дежур частенда да эшләргә өлгергән. Пенсия алдыннан яңадан паспорт өстәленә эшкә кайта һәм яшьрәк буын хезмәткәрләре өчен остаз була.

Хәзер инде Закировлар лаеклы ялда, аларның уңайлы йортларына Түбән Камадан уллары Илнур һәм җиденче сыйныфта укучысы оныклары Азалия дә кайта. Уллары «Трансгаз» АҖда мастер булып эшли һәм җай чыккан саен әти-әнисе янына кайтырга тырыша.

Ишегаллардында ачык төсләрдәге чәчәкләр күзләрне иркәли, ә капка төбеннән Идел киңлекләренең күркәм күренеше ачыла: Якты дигән атама йөрткән бу урамда тыныч һәм уңайлы. Һәм монда, бер-берсенә һәрвакыт терәк булып ярты гасырга якын Закировлар гаиләсе яши. Ә без чын күңелдән Наилә Наил кызын һәм Рашат Кәрим улын якынлашып килүче алтын даталары белән котлыйбыз, юбилярларга нык сәламәтлек, җылы гаилә иминлеге телибез…