Яраткан шөгыле яраткан эшенә әверелгән

 –Беренче этегез кайчан барлыкка килде?

- Мин балачактан ук бөтен җан иясен – мәчеләрне, этләрне өйгә алып кайта идем, аларны дәваладым, карадым. Беренче зур этем немец овчаркасы булды, мин аны әбием йортында асрадым. Шәхси йортка күчкәннән соң, нәселле эт – мареммо-абруцк овчаркасын алдык. Бу итальян токымылы эт. Без аны Мәскәү питомнигыннан сатып алдык. Бу токымын раслаучы документлары булган беренче этебез булды Сатып алу килешүе нигезендә, без токым стандартларын раслау буенча күргәзмәләрдә катнашу бурычы алдык. Шулай итеп, безнең Чупа «Россия чемпионы» титулына ия булды.

Соңрак Чупага бу токымдагы тагын ике эт кушылган. Ә гаилә барлыгы җиде мареммо үстергән һәм асраган, алар иң югарысы – «Дөнья чемпионы»на кадәрге титулларны яулаган. Титул алу күргәзмәгә килү һәм токым стандартларына туры килә торган этне кую гына түгел. Бу – көндәлек хезмәт, этне дөрес тукландыру, карау, урамда йөртү, өйрәтү.

2017 елда гаиләдә ньюфаундленд барлыкка килгән һәм Екатерина эт белән «Сулыкларда коткару хезмәте» кысаларында күнекмәләр үткәрә башлаган.

- Шул ук вакытта мин үземнең питомнигымны рәсмиләштердем, аны «Татарстан сакчылары» дип атадым, - ди ул.  - Этләрне профессиональ әзерләү өчен «Эт токымнары буенча судья-эксперт» белгечлеге, кинолог һәм заводчик курслары уздым. Өч дипломымны да бик яхшы билгеләр белән генә алдым. Шуңа да карамастан, мин ветеринарлар, эт үрчетүчеләр семинарларын һәм конференцияләрен калдырмаска тырышам, аларда яңа белем һәм тәҗрибә алам, ягъни даими рәвештә укыйм.

Алты ел элек Екатерина Крупина эре токымлы этләрне компаньон этләргә алмаштырган. Шулай итеп, гаиләдә беренче рус тое барлыкка килгән.

- Бу декоратив токым, һәрвакыт аралашуга мохтаҗ этләр. Алар шома йонлы, йоны күп карауны таләп итми, ләкин кыш көне саф һавада йөрү өчен аларга җылы кием кирәк.

 -Этләрегезгә нәрсә ашатасыз?

- Махсус азык ашатабыз, аны һәр токым өчен аерым сайлап алабыз. Моннан тыш, витаминнар бирү мәҗбүри, бигрәк тә йөклелек һәм көчекләрне тукландыру вакытында.

Май аенда Екатерина Выборгка барган, анда моно-токым күргәзмәсе булган. Күргәзмәдә рус тое токымлы 35 эт катнашкан.

 -Шуларның өчесе минеке иде. Аннан иң титуллысы булып Яся кайтты, ул берьюлы 5 титулга ия булды: «Россия кинология Федерациясенең яшь чемпионы», «Милли токым клубының яшь чемпионы», «Россиянең яшь шоу-чемпионы», «Россиянең яшь чемпионы», «Россиянең яшь гранд-чемпионы».

Сүз уңаеннан, быел инде биш ай эчендә Екатерина үзенең хайваннары белән дүрт күргәзмәдә катнашкан, июньдә бишенчесенә җыена.