Янәшә тормышыбыз

“Сезнең районда нәрсәләр карарга була?” дигән сорауга без горурлык белән “Лобач тавы” дип җавап бирәбез, анда менгәч, Идел буе киңлекләренең гүзәл күренеше ачыла, теләсә кайсы сезонда үз территориясенә экстремаль ял төре яратучыларны җыя торган Юрий мәгарәсе турында, Горькийның бердәнбер авылдагы музее һәм башка күп нәрсәләр хакында сөйлибез.

Бу атнада без Югары Ослан районында булдык һәм аларның да кунакларга, туристларга сөйләр нәрсәләре күп булуын аңладык. Биредә Иделнең сул як ярына искиткеч күренеш ачыла торган Соколка тавы, белорус язучысы Янка Купаланың Россиядәге бердәнбер музее, Казак чишмәсе буендагы уңайлы аланнар һәм без ишеткән, әмма әле үз күзләребез белән күрмәгән күп нәрсәләр бар.

«Волжская новь» газетасында эшләүче хезмәттәшләребез янына кунакка баргач, без үзебезне нәрсә көткәнен белми идек әле.

Беренчедән, бу юлы безгә бәхет елмайды. Үзебез дә белмәстән, Янка Купала музеена аның туган көнендә килдек. 49 ел элек биредә белорус язучысының музее ачылган, ул 1941 елда гаиләсе белән Казанга эвакуацияләнгән булган. Ләкин бәхетле очрак буенча, елга кичүе янында үз чиратын көткәндә, ул яхшы кешеләрне очрата, алар аңа яшәргә йорт тәкъдим итәләр һәм гаиләсенең яхшы дусларына әвереләләр. Шулай итеп, Белорусиянең талантлы кешесе Казан урынына Печищеда «Иван Оконишников һәм аның уллары» сәүдә йортының легендар он тарту заводы янәшәсенә төпләнә, завод әле дә эшли.

130 еллык тарихы булган бу объектка музейда аерым экспозиция багышланган, чөнки ул авыл халкының күпчелеге өчен эш урыны гына булып калмаган, хәзергечә әйткәндә, социаль вазифалар да башкарган. Аның тирәсендә балалар бакчасы, ашханә, сквер булган шәһәрчек булдырылган. Боларның барысын да эшчеләр турында кайгыртучы хуҗалар төзегән.

Икенчедән, туган көн хөрмәтенә музейда Казанның узган гасырдагы паркларыннан һәм скверларыннан фотокүргәзмә ачылган иде. Кайбер парклар таныш һәм алар безнең көннәргә кадәр сакланган, кайберләре үткәнне сагындырып, моңсу хисләр уята.

Өченчедән, бу көнне музейга Беларусия Республикасының Татарстандагы илчелеге вәкиле килде. Ул музей тарафыннан ел саен үткәрелгән мәгърифәтчелек акциясендә катнашучы хезмәттәшләребезгә һәм педагогларга Грамоталар һәм Рәхмәт хатлары тапшырды.

Безнең өчен заллар буйлап экскурсия үткәргән музей директорын тыңлаганда, аның һәр сүзендә үз эшенә, музейга, бирегә очраклы рәвештә килеп эләккән һәм Идел буе кешеләренең йөрәкләрендә якты эз калдырган язучыга мәхәббәт сизелде. 

Без барган икенче объект – Соколка тавы, анда гражданнар сугышы елларында кызылармиячеләрнең белочехлар белән сугышлары барган. Монда артиллерия коралын урнаштыру өчен кирәкле булган металл җирлек әле дә сакланып калган. Тау башында шул сугышларда һәлак булган чехларга куелган һәйкәл тора, аны чехларның алардан соң килгән буыннары урнаштырган. Янәшәдә тагын бер обелиск тора, анысы тыйнаграк, әмма шул ук дәрәҗәдә әһәмиятле, ул үз идеяләрен һәм Ватанын яклаган кызылармиячеләр истәлегенә куелган.
Таудан Иделгә каравы кызык, тегендә-монда паромнар йөреп тора. Без, гадәттә, паромнан ярга карыйбыз, тик барысын да күрмибез, һәм янәшәбездә булган нәрсәләрнең барысы турында да белмибез.

Күршеләребезнең шулай ук ял итү өчен табигать почмаклары бар. Шуларның берсе – Казак чишмәсе. Сүз уңаеннан, биредә ел саен «Услон-3D» җәядән һәм арбалеттан ату буенча ярышлар үткәрелә. 

Көн җылы һәм кояшлы иде. Шуңа күрә без күрше райондагы истәлекле урыннар белән танышып кына калмадык, хезмәттәшләребез белән дә аралаштык, идеяләребез һәм табышларыбыз белән уртаклаштык, үзебез өчен дә күп файдалы мәгълүмат алдык. 

Туган илгә мәхәббәт үзең яши торган поселок яки район белән генә чикләнми. Күршеләрнең тарихы белән танышканда, син кече Ватаныңның тарихын күбрәк бәяли башлыйсың. Үзебездәге истәлекле урыннар турында гына сөйләп кенә калмыйча, алар турында тагын да күбрәк беләсе килә. Без шулай эшлибез дә –  газетабызда туган якны өйрәнүчеләрнең язмаларын чыгарабыз. Шуңа күрә бу мәгълүматларны укыгыз, исегездә калдырыгыз һәм кунакларыгызга, үз Ватаннары белән горурлансыннар өчен балаларыгызга һәм оныкларыгызга сөйләгез.