Яклаучысызларга һәм мохтаҗларга ярдәм итүчеләр

- Социаль учреждениеләр эшендә төп басым социаль ярдәм чараларын адреслылыкны көчәйтүгә юнәлдерелгән, - дип билгеләп үтә социаль яклау бүлеге җитәкчесе Гөлназ Сафина. - Социаль яклау хезмәткәрләре көн саен пенсионерлар, күп балалы, аз керемле гаиләләр, инвалидлар, ятим балалар һәм башка күп кенә категориядәге кешеләрнең проблемалары белән очраша һәм аларны хәл итәргә тырыша.

Наталья Зиннәтова җитәкләгән «Богородский рай» халыкка социаль хезмәт күрсәтү комплекслы үзәгендә хәзерге вакытта 32 кеше эшли, шуларның 18е – безнең район территориясендә өлкәннәр һәм инвалидлар турында турыдан-туры кайгыртучы социаль хезмәткәрләр, 5 се балаларга һәм гаиләгә ярдәм итү бүлегендә хезмәт куя. Алар күп балалы гаиләләр; авыр тормыш хәлендәге гаиләләр; социаль имин булмаган гаиләләр, шулай ук инвалид бала тәрбияләүче гаиләләр белән эш итәләр.

- Бездә социаль эш буенча белгеч Рузилә Айсина кебек тәҗрибәле хезмәткәрләр, шулай ук яшь белгечләр дә эшли, - ди Наталья Юрьевна. - Рузилә Мөясир кызы бу тармакта 28 ел эшли, Россия Федерациясенең атказанган хезмәткәре, хезмәт ветераны. Ул җаваплы, намуслы һәм гадел кеше, үз эшен бик яхшы белә һәм җиренә җиткереп башкара, заманча технологияләр белән җиңел эш итә һәм яшь хезмәткәрләр өчен үрнәк булып тора.

Бүлектә яшь хезмәткәрләр дә күп. Болар – үзләрен яхшы күрсәткән Любовь Сороковнина, Елена Зарипова, Илзирә Ишмиева, Рената Сафина, алар авыр тормыш хәлендәге гаиләләр белән шөгыльләнәләр, зур һәм җаваплы эш башкаралар.

Илфат Ибниев халыкка социаль хезмәт күрсәтү үзәгендә машина йөртүче булып эшли, 2019 елдан ул «Демография» милли проекты кысаларында диспансерлаштыру һәм профилактик медицина тикшерүләре узу өчен авыл җирлегеннән 65 яшьлек һәм аннан өлкәнрәк кешеләрне үзәк район хастаханәсенә илтү белән шөгыльләнә. Ул пассажирларына хөрмәт белән карый, җаваплы хезмәткәр, эшен төгәл башкара. Районда яшәүчеләр аның турында бары тик уңай фикердә.

- Һәр хезмәткәребез халыкка социаль хезмәт күрсәтү буенча мөһим миссия башкаручы ролен үти, - дип билгеләп үтте Наталья Зиннәтова. - Социаль хезмәткәр көне уңаеннан барлык белгечләребезне, социаль хезмәткәрләрне һөнәри бәйрәмнәре белән котлыйсым килә! Күңелләрегездә беркайчан да ярдәмгә мохтаҗ кешеләргә карата җылылык сүрелмәсен, сезгә иминлек, шатлык, яхшылыкка ышаныч, танылу, нык сәламәтлек, оптимизм, энергия һәм көч телим!».

Рузилә Айсина 1995 елдан бирле халыкка социаль хезмәт күрсәтү өлкәсендә эшли, ул өлкән яшьтәге кешеләрне караган, шуңа күрә бу эшне яхшы белә. Ә хәзер ул безнең район буенча барлык социаль хезмәткәрләрнең эшчәнлегенә җитәкчелек итә.

- Мин үз эшемне яратам, башкасын күз алдына да китерә алмыйм. Нурания Зиннәтуллина җитәкчелегендә эшли башладым, ул җитәкче генә түгел, остаз да булды, безне эшкә өйрәтте. Хәзер үз тәҗрибәмне хезмәттәшләрем белән уртаклашам, социаль ярдәмгә мохтаҗларга күп игътибар бирәм. Кешеләр белән, бигрәк тә өлкән яшьтәгеләр белән эшләү җиңел түгел: һәрвакыт яхшы кәефтә булырга, тыңларга, ярдәм итә белергә кирәк, чөнки өлкән буын тәрбиягә генә түгел, рухи ярдәмгә дә мохтаҗ. Социаль хезмәткәр һәркем белән уртак тел таба белергә тиеш. Бу эш түгел, бу кешеләргә ярдәм итү миссиясе, әлеге өлкәдә һәркем эшли алмый, чөнки син күңелеңнең бер кисәге бүлешергә тиеш, кайгыртуга мохтаҗ булган башка кешеләргә күп көч бирергә тиеш. Мин барлык хезмәттәшләремне һөнәри бәйрәм белән котлыйм, аларга нык сәламәтлек, игелек, кешеләргә карата мәрхәмәтлек һәм күңел күтәренкелеге телим.

Субсидияләр яки пособиеләр мәсьәләләре буенча социаль ярдәм бүлегенә бер тапкыр булса да мөрәҗәгать иткән кешеләр Светлана Филиппованы яхшы белә, ул күп еллар турыдан-туры район халкы белән эшләде, аларны кабул итте, сорауларга җавап бирде, телефон аша консультация бирде, гариза язарга, кирәкле документлар һәм мәгълүматлар тапшырырга ярдәм итте. Хәзер Светлана Александровна 23 нче РЦМПны җитәкли. Ул 11 ел социаль белгеч булып эшләде, аңа хәзер дә районда яшәүчеләр субсидияләр, пособиеләр һәм компенсация билгеләү буенча мөрәҗәгать итәләр, балалары бакчага йөрүче ата-аналар да, пенсионерлар да аны яхшы белә һәм намуслы хезмәте, ярдәмчеллеге, компетенциясе һәм эчкерсез ярдәме өчен хөрмәт итә. Светлана Филиппованы Светлана Сергеева алыштырды, аның эш тәҗрибәсе бар һәм бу эшчәнлек белән таныш, шуңа күрә халык, аңа мөрәҗәгать иткәндә, борчыган мәсьәләләрен җиңел генә хәл итә алачак.