Гомерен балаларга белем бирүгә багышлаган

– Мәктәбебез, бай традицияләргә ия булуга карамастан, укучылар саны кимү сәбәпле, аз комплектлы мәктәпкә әверелде, миңа төп фәнем физикадан тыш, яңадан белем алып, география укыта башларга туры килде, – ди Сәкинә Рәүф кызы.

Укытудан тыш, педагог 11 ел дәвамында мәктәп директорының укыту эшләре буенча урынбасары булып хезмәт куя, ә моңа хезмәттәшләренең укытучылык эшчәнлеген контрольдә тоту гына түгел, күп кенә документацияләр белән эш итү, укытучыларны бәйгеләргә, планлы аттестацияләргә әзерләү дә керә. Шул ук вакытта Сәкинә Рәүф кызы югары уку йортларына керүдә физика фәненнән имтихан тапшыру зарурлыгы булган чыгарылыш сыйныф укучыларын әзерли.

– Фаил Заһретдинов, Илназ Гайфуллин, Парвина Хәсәнова – КНИТУга, Дилүс Нигъмәтуллин КАИга укырга керделәр. Алар югары баллар белән аерылып тормасалар да, физикадан имтиханны ышанычлы рәвештә тапшырдылар һәм шушы балл нәтиҗәләре белән югары уку йортларына керә алдылар, – ди Сәкинә Рәүф кызы.

Аның укучылары фәнни конференцияләрдә, республика укучылар олимпиадасында катнаша. Бүген дә ул укучыларга белем бирүен дәвам итә, аларга физик күренешләрнең һәм законнарның нигезләрен аңлата, фәнни фикерләү күнекмәләрен төшендерә.