Газетаны һәрчак яратып укый

Олы яшьтә булуына карамастан, ул бик шат күңелле һәм аралашучан хатын-кыз. Мине, кунакка көтеп алгандай, бусагадан ук елмаеп каршы алды һәм өстәл янына алып килде, анда фотосурәтләр һәм яхшы хезмәте өчен бирелгән грамоталар ята иде.

Динара Салават кызы Олы Яңасала авылында 1943 елда туган. Аңа бик күп авырлыклар күрергә туры килгән: ачлыкны да кичергән, авыр эшләрдә дә эшләгән, әмма шуңа да карамастан, көр күңеллелеген югалтмаган.

Яшь кыз хезмәт юлын дуңгызлар караудан башлаган. Фотосурәтләрдән безгә зифа буйлы, матур кыз карый, ул үз эшен яратып һәм оста итеп башкарган. Күп тә үтми, эш сөючән һәм шат күңелле кыз, кияүгә чыгып, Олы Бортас авылына ире янына күченгән. Биредә аңа эшен алыштырырга туры килгән, бик тиз генә сыер савучы эшен дә үзләштергән, югары савым күрсәткечләре өчен күп тапкырлар Мактау грамоталары белән бүләкләнгән. Ә 1982 елда һәр сыердан 3022 кг сөт сауган.

Районның алдынгы терлекчеләре белән бергә ул Ленинград шәһәренә юллама белән бүләкләнгән.

– Бу сәфәрдә сыер савучылардан без өчәү генә идек, калганнары барысы да җитәкчеләр – колхоз рәисләре, авыл хуҗалыгы оешмасы башлыклары һәм без: өч гади хезмәт кешесе. Ленинградта безгә бик ошады, без анда бер атна буе яшәдек, барлык истәлекле урыннарны карадык, мин еш кына ул сәфәрне искә төшерәм.
Динара Салават кызының грамоталары чыннан да күп, ә менә аңа «Хезмәт ветераны» исеме бирелмәгән.

Нуриәхмәт абый белән алар 34 ел бергә гомер иткәннәр. Кызлары Лилия медицина училищесын тәмамлап, үзәк район хастаханәсендә эшли, хезмәтен балалар бүлеге стационарында башлаган, хәзер поликлиникада. Ул атна саен әнисе янына өй эшләрендә ярдәм итәргә килә.

Ире вафат булгач, Динара апа икенче тапкыр кияүгә чыккан. Гомәр абый белән 20 елдан артык тату яшәгәннәр һәм менә инде дүрт елдан бирле ялгызы. 

– Ул бик игелекле, - ди күршесе Гөлфия Садриева. - Мохтаҗларның барысына да – балаларга да, өлкәннәргә дә ярдәм итә.

Гөлфия Садриеваның улы махсус операциядә хезмәт итә, улыннан күптән хәбәр булмауга ана бик борчыла.

2010 елда Динара Садыйкова янына «Мәхәббәт» газетасыннан журналист килгән булган, ул вакытта аның тормышы, игелекле эшләргә, йорт хуҗалыгын алып барырга өлгерүе һәм якыннары белән тату яшәве турында зур мәкалә чыккан.

– Мин район газетасына һәрвакыт язылам һәм хәзергәчә аны бик теләп укыйм. Һәм сезнең минем янга килүегезгә бик шатмын.

Ә без исә шундый актив язылучыларыбыз – бүләк уйнатуда җиңүчеләр булганга бик шатбыз һәм алар турында газета укучыларыбызга бик теләп сөйлибез.