Газетага язылу – гаилә традициясе

Әлфия Гариф кызы тумышы белән Кыртападан. Заманында Апас һөнәри учлищесын тәмамлап, авыл клубына методист булып эшкә урнашкан. Озакламый эретеп ябыштыручы булып эшләгән Илдар Бикчәнтәевка кияүгә чыккан, уллары Илназ туган. Узган елның ноябрендә ул армиядән кайткан һәм хәзер С.П. Горбунов исемендәге Казан авиация заводында эшли. 

Бикчәнтәевлар әти-әниләре йортында 20 ел гомер итәләр, хуҗа кеше инде лаеклы ялда, Әлфия исә күптән түгел «Акчарлак» спорт комплексына эшкә урнашкан, шулай итеп, спорт вакыйгалары турында газетабыз аша гына түгел, турыдан-туры беләчәк. Өйдә дә эш җитәрлек – ике сыер, бозау, кош-корт асрыйлар: авылда диванда эшсез утырып булмый. Ә без тагын бер хезмәт сөючән авыл гаиләсенең редакциябез оештырган бүләк уйнатуда җиңүче булуына бик шатбыз…